Թբիլիսիի հայկական թատրոնը վերակառուցումից հետո նոր շունչ կստանա
Նմանատիպ
Թբիլիսիի Հավլաբար թաղամասում գտնվող Պ. Ադամյանի անվան դրամատիկական թատրոնի շենքը երկար ընդմիջումից հետո իր դռները կբացի թատերասերների առաջ նոր, ժամանակակից դահլիճով` ձայնային, նոր ճեմասրահով և զինված լուսային լավագույն տեխնիկայով: Այս մասին մարտի 13-ին լրագրողների հետ հանդիպմանն ասաց թատրոնի գեղարվեստական ղեկավար Արմեն Բայանդուրյանը:
«Շենքն ամբողջությամբ կքանդվի և կվերակառուցվի 1936 թվականի նախագծով: Եթե շենքի վերանորոգումը տևելու էր երկու տարի ինը ամիս, վերակառուցման դեպքում մեկ տարի կխնայվի: Այն քանդելը կտևի երեք ամիս, և մինչ այս տարվա դեկտեմբերի 28-ը պատրաստ կլինի շենքի կմախքը: Իսկ ներքին աշխատանքները կավարտվեն մեկ տարի և մի քանի ամիս անց: Մեր թատրոնի շենքը կդառնա Վրաստանի լավագույն թատերական շենքերից մեկը»,-«Արմենպրես»-ի հաղորդմամբ` նշեց Արմեն Բայանդուրյանը:
Թատրոնի վերակառուցումից հետո նախատեսվում է այնտեղ թանգարան բացել, քանի որ թատրոնն ունի 162 տարվա պատմության ընթացքում կուտակած մեծ արխիվ, որը կարելի է ցուցադրել թատերասերներին:
Պետրոս Ադամյանի անվան հայկական դրամատիկական թատրոնի շենքը կառուցվել է 1936 թվականին: Յոթ տարի առաջ թատրոնի շենքի վրա ճեղքեր են հայտնվել: Սեյսմիկ կենտրոնից հրավիրված մասնագետները, ստուգելով շենքի վիճակը, պարզել են, որ այն վթարային է, և այնտեղ չի կարելի ներկայացումներ խաղալ: Թատրոնի ղեկավարությունը բազմիցս դիմել է Վրաստանի իշխանություններին հարցի կարգավորման համար, սակայն թատրոնի վերանորոգման խնդիրը ձգձգվել է:
Վրաստանի նախկին վարչապետ, բարերար Բիձինա Իվանիշվիլին շենքի խնդիրների լուծման ողջ ֆինանսական ծանրությունն իր վրա է վերցրել, և 2017-ի օգոստոսին մեկնարկել են շենքի վերանորոգման աշխատանքները: Պարզվել է, որ այն չափազանց վթարված է և նորոգման դեպքում հետո ստիպված կլինեն նորից նորոգել: Որոշվել է քանդել թատրոնը, վերակառուցել այն` պահպանելով հին նախագիծը:
Հետևեք մեզ նաև Telegram-ում