Վարչապետը հավատացած է, որ Սփյուռքի յուրաքանչյուր ներկայացուցիչ կարող է իր ներդրումն ունենալ Հայաստանի զարգացման գործում
Նմանատիպ
Սփյուռքի յուրաքանչյուր ներկայացուցիչ կարող է իր ներդրումն ունենալ Հայաստանի զարգացման գործում: Այս մասին Ազգային ժողովում ՀՀ կառավարության հետ հարց ու պատասխանի ժամանակ նշեց ՀՀ վարչապետ Կարեն Կարապետյանը` պատասխանելով «Ելք» խմբակցության պատգամավոր Էդմոն Մարուքյանի հարցին: Պատգամավորն իր հարցում հիշեցրեց, որ Լիբանան այցի ժամանակ մի կողմից ՀՀ վարչապետը հայտարարել էր, որ գործարարները կարող են գալ և ներդրումներ կատարել Հայաստանում, մյուս կողմից՝ երկրի ներսից ազդակներ են գնում այն մասին, թե փոքր և միջին բիզնեսը շնչահեղձ են լինում: «Այս հակասությունների ֆոնին ինչպե՞ս եք պատկերացնում Հայաստան ներդրումներ բերելը»,- հարց հնչեցրեց Էդմոն Մարուքյանը
«Մենք չենք ասում՝ մեր երկրում բոլոր խնդիրները լուծել ենք, ամեն դեպքում վիճակագրությունը ցույց է տալիս, որ փոքր և միջին բիզնեսն աճել է: Կառավարությունում մշտապես բիզնես պայմանների լավացման վրա աշխատում ենք, հստակ գիտենք՝ ինչն ենք փոխել, փոխածի որ մասն է հանգեցրել աճի: Ես հավատացած եմ, որ սփյուռքահայության ամեն ներկայացուցիչ կարող է իր մասնաբաժինն ունենալ երկրի զարգացման գործում»,- «Արմենպրես»-ի հաղորդմամբ՝ ասաց վարչապետ Կարեն Կարապետյանը:
Էդմոն Մարուքյանը հարցրեց՝ արդյո՞ք վարչապետի թեկնածուի անորոշությունն ինչ-որ ձևով ազդում է բիզնեսի վրա: Կարեն Կարապետյանը պատասխանեց, որ կան մարդիկ, ովքեր այդ հանգամանքը հաշվի են առնում:
«Մեր խնդիրն է՝ այնպիսի համակարգ ստեղծել, որ անձից կախված բիզնես անել- չանելու երկմտանքը նվազի»,-ասաց վարչապետը:
Հետևեք մեզ նաև Telegram-ում