Ադրբեջանցի ընդդիմադիրն ահազանգում է որդուն սպառնացող վտանգի մասին
Նմանատիպ
Ադրբեջանի հիմնական ընդդիմադիր ուժը հանդիսացող «Դեմոկրատական ուժերի ազգային խորհրդի» արտաքին հարցերով պատասխանատու նախկին պատգամավոր Գյուլթեքին Հաջիբեյլին իր ֆեյսբուքյան էջում գրառում կատարելով հայտնել է, որ իր 13-ամյա որդուն վտանգ է սպառնում:
Այս մասին հայտնում է ադրբեջանական meydan.tv-ն:
Հաջըբեյլին հայտնել է, որ երկրի իշխանությունների կողմից իր որդուն սպառնացող վտանգի մասին իրեն ապրիլի 1-ին հայտնել է Ադրբեջանի իրավապահ մարմիններում աշխատող մի անձ, ով չի մանրամասնել, թե ինչ վտանգի մասին է խոսքը:
«Ես երբեք իմ դեմ ուղղված սպառնալիքներին կարևորություն չեմ տվել: Այս անգամ նույնպես կարևորություն չէի տա, եթե չլիներ 2013 թ. դեպքը: 2013թ. փետրվարին նույն աղբյուրն ինձ ասաց, որ տղայիս կարող եմ կորցնել: Ես այդ անգամ լուրջ չվերաբերվեցի և արդյունքում երեխաս դարձավ իմ քաղաքական գործունեության զոհը և ծանր հոգեբանական խնդիրներ ունեցավ սպառնալիքների հետևանքով: Այդ ամենից հետո երեխաս 2 տարի հոգեբանական բուժում ստացավ: Հիմա բաց կերպով հայտարարում եմ, որ եթե երեխայիս դեմ որևէ քայլ արվի, կլինի ֆիզիկական, հոգեբանական հարձակում, դժբախտ պատահար կամ որևէ այլ բան դա կլինի արված իշխանությունների կողմից»,-նշել է Հաջիբեյլին:
Meydan.tv-ի հետ զրույցում նախկին պատգամավորը նշել է, որ այս հարցով դեռևս չի դիմել իրավապահ մարմիններին:
Ադրբեջանում ապրիլի 11-ին տեղի են ունենալու նախագահական արտահերթ ընտրություններ: Ադրբեջանում իշխող ալիևյան կլանն ամեն կերպ փորձում է ընտրություններում հաղթել որքան հնարավոր է բարձր ձայներով, և այդ նպատակով, ինչպես նախկինում կիրառում է ընդդիմությանը ճնշելու ցանկացած միջոց:
Ադրբեջանական ընդդիմադիր ուժերի առաջին համատեղ նախընտրական հանրահավաքը տեղի է ունեցել 2018թ. մարտի 10-ին, երկրորդը՝ մարտի 31-ին:
2013 թվականին ստեղծված Դեմոկրատական ուժերի ազգային խորհրդի կազմում ընդգրկված են «Ժողովրդական ճակատ» կուսակցությունը, մեծ թվով ժողովրդավարական հասարակական եւ քաղաքացիական ակտիվիստներ:
Ադրբեջանում ընդդիմադիրներին ճնշելու համար լայնորեն օգտագործվում են անհիմն ձերբակալությունները, հարազատներին վնասելու սպառնալիքները, անձնական կյանքին վերաբերվող գաղտնի ինֆորմացիան հրապարակելու սպառնալիքները:
Հետևեք մեզ նաև Telegram-ում