Նիկոլ ջան, կազմակերպում ես, մինչև վերջ պատասխանատվություն կրի. ձերբակալված անչափահասի հայր (Տեսանյութ)

Նիկոլ ջան, կազմակերպում ես, մինչև վերջ պատասխանատվություն կրի. ձերբակալված անչափահասի հայր (Տեսանյութ)

Հանրային ռադիոյի շենք ներխուժելու դեպքի առթիվ հարուցված քրեական գործի շրջանակներում ձերբակալված 16-ամյա Էրիկ Խաչատրյանի հայրը հուսահատության մեջ է։

«Նիկոլ Փաշինյանի հանրահավաքի պատճառով իմ երեխեն գնացել, մտել ա ռադիոտուն, գործեր են հարուցել ու հիմա երեխուս դատում են», – Aysor.am-ի թղթակցի հետ զրույցում ասում է ձերբակալված անչափահասի հայրը՝ Արմեն Խաչատրյանը։

Նրա խոսքով՝ ինքը տեղյակ չի եղել կատարվածի մասին, իսկ Էրիկը դասի է եղել։

«Ես տեղյակ չեմ եղել։ Ես կարող ա՞ իմ երեխուն ասել եմ՝ գնա կրակի բերան։ Միտինգ ա եղել, Նիկոլ Փաշինյանը չի վերահսկել, երեխեն ընգել ա հոսանքի տակ ու գնացել ա, ընգել ա կրակի բերան։ Հիմա էլ կադրերում երևում ա, որ իմ տղեն դուռն ա ջարդում։ Ընենց քրեական գործ ա հարուցված, որ ով կարդում ա, ընգնում ա գետնին», – նշում է հայրը։

Նա հորդորում է Փաշինյանին «մինչև վերջ պատասխանատվություն կրել» կատարվածի համար։

Ավելի վաղ Aysor.am-ը անդրադարձել էր Խաչատրյանի գործին և տեղեկացրել, որ այժմ Էրիկը ձերբակալված է, կասկածյալի կարգավիճակ ունի, գտնվում է ձերբակալվածների պահման վայրում։ Ձերբակալման 72 ժամը, փաստաբանի փոխանցմամբ, չի ավարտվել և առաջադրված մեղադրանք չկա։

Նա կասկածվում է ՀՀ Քրեական օրենսգրքի 225 հոդվածի 1-ին և 2-րդ մասերով՝ «Զանգվածային անկարգություններ կազմակերպելը և զանգվածային անկարգությունների ժամանակ բռնություն գործադրելը» և 225.1 հոդվածի 1-ին մասով՝ «Օրենքով սահմանված կարգի խախտմամբ հավաք կազմակերպելը և անցկացնելը» հանցանք կատարելու մեջ։

 

Հետևեք մեզ նաև Telegram-ում