Դողու Փերինչեքը Թուրքիայում վաղաժամ ընտրությունների նշանակումը համարում է իշխանությունների վախի արդյունք

Դողու Փերինչեքը Թուրքիայում վաղաժամ ընտրությունների նշանակումը համարում է իշխանությունների վախի արդյունք

Թուրքիայում գործող «Հայրենիք» կուսակցության (Vatan partisi) նախագահ, ազգայնական գործիչ Դողու Փերինչեքն անդրադառնալով Թուրքիայում վաղաժամ նախագահական և խորհրդարանական ընտրությունների նշանակմանը նշել է, որ իշխանություններն այդ քայլին գնացել են վախից դրդված:

Այս մասին, ինչպես հաղորդում է «Արմենպրես»-ը, հայտնում է թուրքական Diken պարբերականը:

Փերինչեքը նշել է, որ Թուրքիայի նախագահ Ռեջեփ Թայիփ Էրդողանն ու «Ազգայնական շարժում» կուսակցության նախագահ Դևլեթ Բահչելին արտահերթ նախագահական ընտրությունների նշանակմամբ խախտում են երկրի սահմանադրությունը և սահմանադրությունը վերացնելու փորձ են կատարում:

«Նրանք վախի մեջ են, ինչի՞ համար է այս աստիճան սարսափը: Նրանք երկուսն էլ կարող էին ընտրությունների ամսաթվի մասին հայտարարություն կատարել, սակայն այս դեպքում, երբ երկուսով գլուխ գլխի տալով հայտարարեցին այդ մասին սա հեղաշրջում է: Նրանք փորձում են վերացնել սահմանադրությունը: Օրենքը շրջանցելով սահմանադրությունն արհամարհելը հեղաշրջում է: Խորհրդարանը պետք է չհաստատի այդ որոշումը»,- նշել է Դողու Փերինչեքը:

Փերինչեքը հավելել է նաև, որ ԱՇԿ-ն հասկանալով, որ այլևս վերանում է քաղաքական ասպարեզից փորձում է Էրդողանի «Արդարություն և զարգացում» կուսակցության հետ համագործակցելով պահպանել իր գոյությունը:

«ԱՇԿ-ն հասկանալով, որ քաղաքական դաշտից վերջնականապես ջնջվում է, փորձում է իշխող կուսակցության հետևից «քարշ գալով» պահպանել իր գոյությունը»,-ասել է Փերինչեքը:

Հետևեք մեզ նաև Telegram-ում