Օտարերկրյա դեսպաններն արձանագրել են հայ իրավապահների առավել քան զուսպ մոտեցումը հավաքի մասնակիցների նկատմամբ
Նմանատիպ
Հայաստանում հավատարմագրված օտարերկրյա մի շարք դեսպաններ նախորդ օրերին ՀՀ արտգործնախարար Էդվարդ Նալբանդյանի կողմից հրավիրված հանդիպումների ժամանակ համաչափ և առավել քան զուսպ են գնահատել հայ իրավապահների մոտեցումները հավաքի մասնակիցների նկատմամբ: Այս մասին օտարերկրյա լրատվամիջոցների ներկայացուցիչների հետ հանդիպմանն ասաց ՀՀ արտաքին գործերի նախարարը:
Նալբանդյանը հայտնեց, որ նաև առանձին հանդիպումներ է ունեցել մի շարք օտարերկրյա դեսպանների հետ: «Ես աշխատել եմ որպես դիվանագետ մի շարք երկրներում և գիտեմ, թե այնտեղ ինչպիսի մոտեցում է դրսևորում օրենքի սահմաններում ազատ հավաքների անցկացման վերաբերյալ և թե ինչպես են արձագանքում իշխանությունները և իրավապահ մարմինները: Վստահեցնում եմ, որ ինչպես առանձին հանդիպումների ժամանակ, այնպես էլ դեսպանների ընդհանուր հավաքին, որին հրավիրել էինք, մի շարք դեսպաններ, արձագանքելով նրան, ինչ ներկայացրեցինք, գնահատեցին այն համաչափ և առավել քան զուսպ մոտեցումները, որոնք կիրառվել են իրավապահ մարմինների կողմից»,- ասաց Նալբանդյանը: Նախարարը շեշտեց, որ նման գնահատական միանշանակ հնչել է մի քանի դեսպանի կողմից, և ոչ մի դեսպան հակառակը չի ասել:
Նա հիշեցրեց, որ վերջին 10 օրերի ընթացքում միայն ոստիկանության կողմից շուրջ 4 տասնյակ հայտարարություն է արվել, որոնց մեջ նշում է, որ խախտվում է ՀՀ օրենքը հանրահավաքներ անցկացնելու մասին:
«Բացի հավաքի մասնակիցներից, կան նաև այլ քաղաքացիներ, պետք է նրանց իրավունքները ևս հարգվեն: Չեմ կարծում, որ որևէ երկրում թույլատրելի լիներ սահմանափակել այն անձանց տեղաշարժը, ովքեր չեն մասնակցում ցույցերին: Չեմ կարծում, որ որևէ երկրում թույլատրելի կլիներ ներխուժել դպրոցներ և աշակերտների դիմաց հայհոյել ուսուցիչներին. ինչպե՞ս են հետո այդ ուսուցիչները շարունակելու դասավանդել երեխաներին»,- ասաց ԱԳ նախարարը:
Հետևեք մեզ նաև Telegram-ում