Դաշնակցային հարաբերությունները սիրո մասին չեն, այլ շահերի

Ռուս քաղաքագետ Սերգեյ Մարկեդոնովը վերջին շրջանում Հայաստանի ներքաղաքական կյանքում տեղի ունեցած իրադարձությունները չի կապում մայդանի կամ այլ դեպքի հետ, այլ շեշտադրում է դրանց ներքին հայկական բնույթը: Քաղաքական և ռազմական վերլուծության ինստիտուտի միջազգային խնդիրների բաժնի վարիչ Սերգեյ Մարկեդոնովն այս մասին խոսեց «Երևան-Մոսկվա» տեսակամուրջի ժամանակ: Նախ նա նշեց, որ առաջիկայում ժամանելու է Երևան՝ արդեն ներսից հետևելու իրադարձություններին ընթացքին:

Նա ներկայացրեց որոշ կարծիքներ, որոնք, ըստ իրեն, կարևոր են ռուսական լսարանի համար: «Հետխորհրդային երկրներում իրականացվող բոլոր զանգվածային ակցիաներն ընդունված է նմանեցնել մայդանին կամ համարել, որ դրանք ուկրաինական իրադարձությունների պատճենն են: Բայց ես դրա հետ բացարձակ համաձայն չեմ, քանի որ առաջին տարին չէ, որ ուսումնասիրում եմ Հայաստանը: Կարող եմ ասել, որ այս երկիրը բողոքի ակցիաների հարուստ փորձ ունի, որը ոչ մի կերպ կապ չունի Կիևի 2014-2015 թթ. իրադարձությունների հետ, և այն ունի իր շարժիչ ուժերն ու նախադրյալները»,-ասաց քաղաքագետը:

Նրա խոսքով՝ Հայաստանը հետխորհրդային այն երկրներից է, որը կազմավորվել է բողոքի ակցիաների արդյունքում՝ նկատի ունենալով 1988-ին սկիզբ առած Ղարաբաղյան շարժումը: Մարկեդոնովի դիտարկմամբ՝ դրանից հետո յուրաքանչյուր ընտրություն զուգորդվել է բողոքի զանգվածային ակցիաներով:

Ինչ վերաբերում է ներկայիս իրադարձություններին, ապա քաղաքագետը կարծում է, որ դրա համար կային նախադրյալներ՝ սոցիալ-տնտեսական իրավիճակով բավարարված չլինելը, մենաշնորհների առկայությունը և այլն: Նրա խոսքով՝ հայկական բողոքի ակցիաներին չեն հնչել աշխարհաքաղաքական ուղղության փոփոխության վերաբերյալ լոզունգներ, ընդհակառակը, շեշտադրվել է, որ Ռուսաստանի հետ գործընկերային հարաբերությունները պահպանվելու են: «Ընդհակառակը՝ բողոքի ակցիաների առաջնորդ Փաշինյանն ասում էր, որ ռուսական վեկտորը մնում է, բայց կան նրբություններ, կան խնդիրներ: Բայց միթե այդ խնդիրները չեն եղել Սարգսյանի կամ Քոչարյանի նախագահության ընթացքում: Եղել են, դաշնակիցների միջև դրանք միշտ էլ առաջանում են, դրանից վախենալ պետք չէ: Դաշնակցային հարաբերությունները սիրո մասին չեն, այլ շահերի: Շահերը կարող են համընկնել կամ ոչ, կարևորը պետք է կարողանալ դրանք բերել նույն դաշտ և որակապես աշխատել դրանց ուղղությամբ»,-ընդգծեց Սերգեյ Մարկեդոնովը:

Քաղաքագետը կարևորեց երկկողմ հարաբերություններում կառուցողական մոտեցման պահպանումը, քանի որ դեմքերի շուրջ չեն այդ հարաբերությունները կառուցվում, այլ այս կամ այն քաղաքական, տնտեսական, մշակութային հարցերի շուրջ: