Երևանի 2800-ամյակին նվիրված այգում ծառերի հատման դեմ բողոքող ակտիվիստները ներխուժել են քաղաքապետարանի շենք
Նմանատիպ
ԵՐԵՎԱՆ, 16 ՄԱՅԻՍԻ, Times.am: Մյասնիկյանի արձանի հարակից այգում ծառերի հատման դեմ բողոքող ակտիվիստները ներխուժել են քաղաքապետարանի շենք և հանդիպում են պահանջում Երևանի քաղաքապետ Տարոն Մարգարյանի հետ: Մոտ 3 տասնյակ ակտիվիստներ ներխուժեցին քաղաքապետարանի շենք և բարձրացան Տարոն Մարգարյանի աշխատասենյակ:
Ակտիվիստներին դիմավորեց Երևանի քաղաքապետարանի հասարակայնության հետ կապերի վարչության պետ Արթուր Գևորգյանը: Այնուհետև քաղաքապետարանի մի խումբ աշխատակիցներ և ոստիկանները փակեցին դեպի քաղաքապետի աշխատասենյակ տանող մուտքը:
Ակտիվիստներին մոտեցավ Երևանի քաղաքապետի տեղակալ Դավիթ Օհանյանը: Նա նշեց, որ նման ձևով հարցեր չեն լուծում: Նա առաջարկեց վերադառնալ ճեպազրույցների դահլիճ, որտեղ հանդիպում կունենան քաղաքապետարանի աշխատակազմի ղեկավարի և համապատասխան մարդկանց հետ, ովքեր կպատասխանեն նրանց հարցերին:
Ակտիվիստներն իրենց հերթին պնդեցին, որ ցանկանում են հանդիպել միայն Տարոն Մարգարյանի հետ, քանի որ այդ ամենի պատասխանատուն Տարոն Մարգարյանն է: Դավիթ Օհանյանը նշեց, որ Երևանի քաղաքապետարանում յուրաքանչյուր ոլորտ ունի իր պատասխանատուն: «Հիմա բարձրանանք, դուք կհանդիպեք այդ ոլորտի պատասխանատուների հետ, եթե ձեր հարցերի պատասխանները չստանաք, դրանից հետո քննարկենք»,- ասաց Երևանի փոխքաղաքապետը՝ խոստանալով հրավիրել նաև Տարոն Մարգարյանին:
Ակտիվիստները մերժում են այլ առաջարկներ ու պնդում են, որ ցանկանում են հանդիպել միայն Տարոն Մարգարյանին:
Հետևեք մեզ նաև Telegram-ում