Ռուսական գազի թանկացման դեպքում նախարարը հնարավոր է համարում իրանական գազի ներկրումը

Ռուսական գազի թանկացման դեպքում նախարարը հնարավոր է համարում իրանական գազի ներկրումը

ԵՐԵՎԱՆ, 8 ՀՈՒՆԻՍԻ, Times.am: Էներգետիկ ենթակառուցվածքների և բնական պաշարների նախարար Արթուր Գրիգորյանը ձեռնպահ է մնում այս պահին խոսել Ռուսաստանից ներկրվող գազի գնի հնարավոր բարձրացման մասին: Կառավարության նիստից հետո լրագրողների հետ զրույցում, պատասխանելով հարցին, թե հնարավո՞ր է, որ Ռուսաստանից ներկրվող գազի գինը տարեվերջին սահմանին բարձրանա, նախարարը պատասխանեց. «Պայմանագիրը տարեվերջին պետք է թարմացվի: Հնարավոր է, թե հնարավոր չէ՝ թույլ տվեք այս պահին չարտահայտվեմ, գազի գնի վերաբերյալ քննարկումները կսկսվեն նոյեմբերին: Երբ սկսվեն քննարկումները, մենք ձեզ տեղյակ կպահենք»:

Հարցին՝ եթե ՌԴ-ն գնա նման քայլի, հնարավո՞ր է Հայաստանը բանակցություններ սկսի Իրանի հետ այդ երկրից գազ գնելու հարցի շուրջ, Արթուր Գրիգորյանը պատասխանեց. «Եթե Ռուսաստանը նման քայլի գնա, ամեն բան էլ հնարավոր է, մենք շահագրգռված ենք, որ Հայաստան ներկրենք էժան գազ»:

Ավելի վաղ նախարար Արթուր Գրիգորյանը նշել էր, որ սահմանին ռուսական գազը արժե 150 դոլար հազար խմ-ի դիմաց, իսկ իրանական գազը՝ 165 դոլար:

Հետևեք մեզ նաև Telegram-ում