Եթե տնից բան չուղարկեն, բանակի հատկացրածն ամբողջովին բավարար է, որ զինվորները ապահովված լինեն. Նորայր Յոլչյան (Տեսանյութ)

Եթե տնից բան չուղարկեն, բանակի հատկացրածն ամբողջովին բավարար է, որ զինվորները ապահովված լինեն. Նորայր Յոլչյան (Տեսանյութ)

ԵՐԵՎԱՆ, 16 ՀՈՒՆԻՍԻ, Aysor.am։ Տարվա ընթացքում զինծառայողներին տրամադրվում է 16 զույգ գուլպա ամառային համազգեստի հետ, 8 զույգ՝ ձմեռայինի հետ, ընդհանուր առմամբ տարեկան կտրվածքով՝ զինվորին 24 զույգ գուլպա է տրամադրվում, ինչը բավարար է, լրագրողների հետ զրույցում ասաց ԶՈՒ թիկունքի պետ գեներալ-մայոր Նորայր Յոլչյանը՝ ներկայացնելով ՀՀ զինված ուժերում շարքային և կրտսեր ենթասպայական կազմերի պարտադիր զինծառայողներին հատկացվող իրային միջոցները:

Անդրադառնալով տնից զինվորներին ուղարկվող պարագաներին՝ Յոլչյանն ընդգծեց, որ տվյալ պահին հրամանով արգելվել է դրսից ինչ-որ միջոցների փոխանցումը զինվորներին:

«Մենք տրամադրում ենք մինիմալից ավելի, որը բավարար է զինծառայողին ծառայության ընթացքում ապահովելու համար: Վստահեցնում եմ, որ եթե տնից բան չուղարկեն, բանակի հատկացրածն ամբողջովին բավարար է, որ զինվորներն ապահովված լինեն», – ասաց նա:

Անդրադառնալով վարտիքների մասով եղած խնդիրներին՝ Յոլչյանը նշեց, որ զինվորները չեն ցանկանում լվացած վարտիքներ հագնել և նորն են պահանջում: Նա ընդգծեց, որ այս խնդիրը լուծելու համար բոլոր զորամասերում լվածքի մեքենաներ են տեղադրվելու, իսկ զինվորներին անհատական լվացքի պարկեր են տրամադրվելու, որոնցում նրանք իրենց անձնական իրերը կարող են լվանալ:

«Այս տարի 450 լվացքի մեքենա ենք տեղադրելու բոլոր զորամասերում: Ամեն մեկին անհատական լվացքի պարկեր ենք տալու, որ ամեն մեկն իր իրերը երբ պետք է, լվանա», – ընդգծեց նա:

Խոսելով գնումների գործընթացից՝ Յոլչյանն ասաց, որ վերջինս իրականացվում է մրցութային կարգով, և ամեն ինչ բացառապես տեղական արտադրության է:

«Երբ մրցույթը հայտարարվում է, ներկայացվում են այն պայմանները, որոնցով նախատեսված է նյութական միջոցները ԶՈՒ-երին մատակարարել: Ընդունող հանձնաժողովն ապրանքներն ընդունելիս ղեկավավում է նյութական միջոցների տեխնիկական բնութագրերով: Դրանից բացի, նյութական միջոցներն անխտիր անցնում են լաբորատոր փորձաքննություն: Լինի սննդամթերք, թե համազգեստ՝ մինչև փորձաքննության արդյունքները դրական չեն լինում, ոչ մի միջոց չի մուտքագրվում պահեստ», – հավելեց նա:

Հետևեք մեզ նաև Telegram-ում