Ես արժանավայել կյանքով եմ ապրել, ոչ մեկն այս երկրում չի կարող ինձ վարկաբեկել. Ալիկ Սարգսյան (տեսանյութ)

Ես արժանավայել կյանքով եմ ապրել, ոչ մեկն այս երկրում չի կարող ինձ վարկաբեկել. Ալիկ Սարգսյան (տեսանյութ)

ԵՐԵՎԱՆ, 11 ՀՈՒԼԻՍԻ, Tert.am: Ոչ մեկն այս երկրում չի կարող ինձ վարկաբեկել. լրագրողների հետ ճեպազրույցում ասաց ՀՀԿ-ական պատգամավոր, նախկին ոստիկանապետ Ալիկ Սարգսյանը՝ անդրադառնալով 2008-2010 թթ.Արարատի մարզպետի պաշտոնը զբաղեցրած Վարդգես Հովակիմյանի՝ ՀՀԿ կենտրոնական գրասենյակ ուղարկած նամակին։

«Ոչ մեկը թող չփորձի իր անունը բերել, համադրել ինձ հետ: Եկեք իմ ծննդավայր և հարցրեք, թե ով ով է: Ես մաքուր մարդ եմ, մաքուր եմ ապրել ու իմ խիղճը հանգիստ է, որևիցե օրենքի առջև պատասխան տալու խնդիր ես չունեմ և չեմ ունենալու։ Իմ բոլոր արարքների համար պատասխանատու եմ»,- ասաց նա։

Դիտարկմանը, թե ինչու նախկինում չէր բարձրաձայնում այդ մասին՝ Ալիկ Սարգսյանը նշեց, թե ինքը մինչև հիմա ուղղակի լուրջ չի վերաբերվել: «Հիմա հասկացել եմ, որ մարդիկ վարկաբեկելու խնդիր ունեն, իսկ ես կորցնելու ոչինչ չունեմ»,-ասաց նա և նշեց, որ այդ զրպարտությունը զուր փորձ է, քանի որ ինքը երբեք ոչինչ չի թաքցրել, այդ թվում իր ունեցած սեփականությունը:

«Ես բազմաթիվ անգամ ասել եմ, նորից կրկնում եմ՝ ես արժանավայել կյանքով եմ ապրել, իմ ամբողջ աշխատանքային ուղին մաքուր և անբիծ է անցել։ Ես զբաղվել եմ իմ գործով։ Ինչ կարողություն ունեմ, դրա համար համապատասխան բացատրություն և արդարացում ունեմ»,- հավելեց նա։

Վարդգես Հովակիմյանը նամակում գրել էր, որ դեռևս ոստիկանապետի պաշտոնում Ալիկ Սարգսյանն իր նկատմամբ շինծու մեղադրանք է ներկայացրել և քրեական գործ հարուցել բացառապես իր ունեցվածքին տիրանալու նպատակով։ Նամակից հետո Ալիկ Սարգսյանը դիմել էր ՀՔԾ՝ բողոքելով, որ Հովակիմյանը փորձում է շանտաժի միջոցով իրենից գումար կորզել:

Ի դեպ, Ալիկ Սարգսյանը նշեց՝ չգիտի, թե որքան գումար է ցանկացել շորթել:

Հետևեք մեզ նաև Telegram-ում