Վենետիկի հանձնաժողովի նախագահի հայտարարությունը Հայաստանի ընտրական օրենսգրքի փոփոխությունների վերաբերյալ

Վենետիկի հանձնաժողովի նախագահի հայտարարությունը Հայաստանի ընտրական օրենսգրքի փոփոխությունների վերաբերյալ

ԵՐԵՎԱՆ, 19 ՀՈԿՏԵՄԲԵՐԻ, Panorama.am: Վենետիկի հանձնաժողովի նախագահ Ջիանի Բուքիքիոն հայտարարություն է տարածել Հայաստանի ընտրական օրենսգրքի նախագծի վերաբերյալ։ Panorama.am-ին Վենետիկի հանձնաժողովի մամուլի քարտուղարի տրամադրած հայտարարության մեջ ասվում է․

«Վենետիկի հանձնաժողովի և ՀՀ առաջին փոխվարչապետի քննարկումների արդյունքում Վենետիկի հանձնաժողովը ընդունում և աջակցում է այն խաղաղ ճանապարհին, որով հայ ժողովուրդը առաջ է տանում փոփոխությունները։ Ընդունում է Հայաստանում առանձնահատուկ իրավիճակը, որը պահանջում է վաղաժամ ընտրությունների անցկացում։

Ողջունում է Հայաստանի իշխանությունների հանձնառությունը՝ պահպանել միջազգային չափանիշները՝ ընտրական օրենսգրքի վերնայման ժամանակ։

Նշում է, որ առաջարկված փոփոխություններն ունեն լեգիտիմ նպատակներ ու հիմնականում դրական են թվում։

Վենետիկի հանձնաժողովը, մասնավորապես, ողջունում է այն բոլոր քայլերը, որոնք ձեռնարկվել են քվեարկության իրավունքի դյուրացման համար, լրատվամիջոցների հասանելիությունը, դիտորդների իրավունքները և ընդհանուր առմամբ ընտրական գործընթացի թափանցիկությունը ընդլայնելու, ինչպես նաև ընտրական կեղծարարության դեմ պայքարելու համար։

Ողջունում է առաջին փուլից հետո դաշինքների կազմելու մասնակիցների թվի սահմանափակման վերացումը՝ համաձայն Վենետիկի հանձնաժողովի ու ԵԱՀԿ-ԺՀՄԻԳ-ի առանցքային առաջարկությունների։

Ողջունում է Վենետիկի հանձնաժողովի ու ԵԱՀԿ-ԺՀՄԻԳ-ի մյուս առաջարկությունների իրականացումը՝ մասնավորապես,

– ընտրական շեմի և ընտրական գրավի վերադարձման նվազեցումը, ընտրական գրավի գումարի նվազեցումը։

– Դիտորդների ու մամուլի ներկայացուցիչների հավատարմագրման վերջնաժամկետների նվազեցումը, ինչպես նաև դիտորդների աշխատանքի խոչընդոտների վերացումը, ինչպիսին է նրանց թվաքանակի սահմանափակման հնարավորությունը։

– զինված ուժերում ազատ քվեարկության ապահովման երաշխիքները։

Հիշեցնում է Վենետիկի հանձնաժողովի վերապահումները՝ կապված ընտրական համակարգում խոշոր փոփոխությունների հետ, ինչպիսիք են տարածքային (ռեյտինգային) ցուցակների վերացումը, որոնք պետք է կատարվեն ընտրություններին նախորդող 1 տարվա ընթացքում։

Նշում է նաև, որ այս վերապահումները պակաս կարևոր են, եթե քաղաքական ուժերի միջև առկա է կոնսենսուս փոփոխությունների վերաբերյալ»։

Հետևեք մեզ նաև Telegram-ում