«168 Ժամ». Անպատասխան ուղերձներ

«168 Ժամ». Անպատասխան ուղերձներ

«168 Ժամ» թերթի հետ զրույցում իրանցի քաղաքագետ Ալի Սալամին՝ անդրադառնալով Արցախի ԱԳ նախարար Մասիս Մայիլյանի դիտարկմանը, թե Արցախը պատրաստ է Իրանի հետ հարաբերությունների հաստատման, ասել է. «Իրանը բարիդրացիական հարաբերություններ է փորձում պահպանել իր հարևան բոլոր երկրների, այդ թվում՝ Ադրբեջանի հետ: Բնականաբար, միամտություն կլինի կարծել, որ պաշտոնապես նման ուղերձներին ներկայումս հնարավոր է արձագանքել այնպես, ինչպես Արցախը կցանկանար: Սակայն կարևոր է, որպեսզի հնչեն նման ուղերձներ, և ես վստահ եմ, որ Իրանն իր դիվանագիտական խողովակներով արձագանքում է, հայկական կողմերի համար ընդունելի է այս հարցում Իրանի դիրքորոշումը, որն այս պայմաններում չի կարող այլ լինել»:

Իր հերթին՝ մեկ այլ իրանցի քաղաքագետ՝ Կայհան Բարզեգարը, ասել է, որ հարաբերությունների բացակայության դեպքում, երբ կա ցանկություն երկկողմ հարաբերություններ հաստատելու և սահման բացելու հարցում, սակայն դա հնարավոր չէ, պետք է սկսել ակտիվացնել շփումները ժողովուրդների միջև, բարձրացնել միմյանց նկատմամբ ճանաչողությունը:

«Միանգամից ոչինչ տեղի չի ունենում: Ներկայումս չկան հնարավորություններ սկսելու նման պաշտոնական գործընթաց: Սակայն կարող են ակտիվացվել մշակութային կապերը, ճանաչողական ծրագրեր կարող են իրականացվել, որպեսզի ժողովուրդների միջև կապ ստեղծվի, ամրապնդվի, որն իր հերթին՝ կնպաստի հետագայում ձևավորվելիք քաղաքական հարաբերություններին»,- ասել է նա:

Նրա խոսքով՝ ԻԻՀ-ի և ԱՀ-ի միջև հարաբերություններ կհաստատվեն ԼՂ հակամարտության վերջնական կարգավորման և Արցախի միջազգային ճանաչման, կարգավիճակի հստակեցման դեպքում:

«Կարծում եմ` իրատեսական չի լինի նշել, որ մինչ կարգավորումը Իրանը պատրաստ կլինի նման քայլերի, քանի որ դա լի է տարածաշրջանային վտանգներով, որից Իրանը խուսափում է: Որքան էլ դժվար է, Իրանը ձգտում է հավասարակշռություն պահպանել Հայաստանի և Ադրբեջանի միջև, քանի որ Ադրբեջանի հետ Իրանը լուրջ խնդիրներ ունի»:

Իրանցի փորձագետների հետ զրույցի մանրամասները թերթի այսօրվա համարում

Հետևեք մեզ նաև Telegram-ում