ԱՊՀ միջխորհրդարանական ասամբլեայի դիտորդները նախընտրական քարոզարշավի ընթացքում խախտումներ չեն նկատել

ԱՊՀ միջխորհրդարանական ասամբլեայի դիտորդները նախընտրական քարոզարշավի ընթացքում խախտումներ չեն նկատել

ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: ԱՊՀ միջխորհրդարանական ասամբլեայի դիտորդական առաքելության համակարգող, Ղրղզստանի խորհրդարանի փոխնախագահ Միրլան Բաքիրովը հույս հայտնեց, որ դեկտեմբերի 9-ին Հայաստանում կայանալիք արտահերթ խորհրդարանական ընտրությունները կընթանան օրենսդրությանը համապատասխան։ «Արմենպրես»-ի հաղորդմամբ, Կենտրոնական ընտրական հանձնաժողովում լրագրողների հետ ճեպազրույցում Բաքիրովն ասաց, որ իրենք հանդիպել են «Իմ քայլը» դաշինքի ներկայացուցիչների հետ. ԿԸՀ նախագահ Տիգրան Մուկուչյանի հետ էլ քննարկել են մի շարք հարցեր:

«Դեռևս ոչ մի դիտողություն չունենք, որևէ ընտրախախտում չենք նկատել։ Ընտրությունների նախապատրաստական աշխատանքներն ընթանում են ՀՀ օրենսդրության շրջանակներում։ Վաղն առավոտից խմբերով կմեկնենք քվեարկության վայրեր։ Կլինենք ինչպես մայրաքաղաքում, այնպես էլ մարզերում։ Բաժանվել ենք 5 խմբի, մեր դիտորդները 23-ն են, իսկ ԱՊՀ դիտորդական առաքելությունում ընդհանուր առմամբ 80 անդամ կա»,- ասաց նա:

Ղրղզստանի խորհրդարանի փոխնախագահը նշեց, որ ամենայն հավանականությամբ ընտրությունների հաջորդ օրը՝ դեկտեմբերի 10-ին, իրենք դիտորդական առաքելության հաշվետվություն կտրամադրեն։ ԱՊՀ միջխորհրդարանական վեհաժողովի ներկայացուցիչները Հայաստանում են ՀՀ ազգային ժողովի հրավերով, հետևում են ընտրությունների նախապատրաստական, ընտրությունների անցկացման, քարոզչության աշխատանքներին:

Հետևեք մեզ նաև Telegram-ում