Թրանսփարենսի Ինթերնեշնլի և Բաց հասարակության հիմնադրամներ-Հայաստանի միջոցառմանը մասնակցել է նաև ԱԱԽ քարտուղար Արմեն Գրիգորյանը

ԵՐԵՎԱՆ, 5 ՓԵՏՐՎԱՐԻ, Aysor.am: Փետրվարի 4-ին Ամալյա Կոստանյանի անվան ամենամյա մրցանակը շնորհվեց 8-րդ անգամ: Թրանսփարենսի Ինթերնեշնլ հակակոռուպցիոն կենտրոն ՀԿ-ի (ԹԻՀԿ) և Բաց հասարակության հիմնադրամներ-Հայաստանի (ԲՀՀ-Հայաստանի) համատեղ նախաձեռնությամբ սահմանված մրցանակը շնորհվում է սկզբունքային ու խիզախ գործունեության և քաղաքացիական հասարակության զարգացման գործում նշանակալի ներդրման համար:

Հաշվի առնելով 2018թ. բուռն իրադարձությունները՝ Ամալյա Կոստանյանի անվան մրցանակը շնորհվեց ոչ թե առանձին անհատների, այլ՝ քաղաքացիական երկու նախաձեռնությունների՝ «Ռեստարտ» ուսանողական-քաղաքացիական նախաձեռնությանը և Ամուլսարի պահապաններին, տեղեկացնում են Թրանսփարենսի Ինթերնեշնլ հակակոռուպցիոն կենտրոնից։

Մրցանակաբաշխությանը մասնակցում էին նաև ՀՀ Արդարադատության նախարար Արտակ Զեյնալյանն ու Ազգային անվտանգության խորհրդի քարտուղար Արմեն Գրիգորյանը։

Մրցանակաբաշխության մեկնարկին ելույթներ ունեցան Ամալյայի ընկերները և գործընկերները` նշելով, որ պատվով կշարունակեն Ամալյա Կոստանյանի՝ կարճ, բայց վառ կյանքի ընթացքում արված գործը՝ նպաստելով ավելի արդար հասարակության կերտմանը:

«Ամալյան յուրահատուկ վերաբերմունք ուներ երիտասարդությանը: ԹԻՀԿ դռները միշտ բաց էին հենց երիտասարդների համար, կրթելու, գիտելիք ու հմտություն տալու, օգնելու, պաշտպանելու համար: Ինքը համոզված էր երիտասարդության ուժի մեջ և գտնում էր, որ իրենց ակտիվիզմն ու մոբիլիզացիան կփոխեն ամեն ինչ: Կարծում եմ, որ այսօրվա մրցանակի արժանացածները իրապես համապատասխանում են Ամալյա Կոստանյանի գաղափարներին ու կերպարին»,- նշեց ԲՀՀ-Հայաստանի ծրագրերի գծով փոխտնօրեն Դավիթ Ամիրյանը:

«Ռեստարտ» ուսանողական երիտասարդական նախաձեռնությանը մրցանակը շնորհեց Կանանց իրավունքների պաշտպան, «Կանանց ռեսուրսային կենտրոն» ՀԿ-ի ղեկավար Լարա Ահարոնյանը:

«Փորձը ցույց է տալիս, որ երբ երիտասարդները, ուսանողներն են ոտքի կանգնում՝ ամեն ինչ հնարավոր է դառնում և ամեն ինչ ճիշտ ուղղությամբ է ընթանում: «Ռեստարտ» ուսանողական-քաղաքացիական նախաձեռնությունը, սկսելով բուհերում կառավարման, ուսման որակի հետ կապված խնդիրներ բարձրացնել, սկսեց ամբողջ երկիրը ռեստարտ տալ, շարժումն ավելի զարգացավ, միացավ հեղափոխությանը, և մենք այսօր պարտական ենք նրանց այս իրողության համար», – եզրափակեց Լարա Ահարոնյանը՝ մրցանակը հանձնելով ռեստարտականներ Դավիթ Պետրոսյանին և Շուշան Հարությունյանին:

Ամուլսարի պահապաններին պարգևատրեց իրավապաշտպան, լրագրող և հրապարակախոս Զարուհի Հովհաննիսյանը՝ նշելով որ Ամալյա Կոստանյանի անվան մրցանակը հանձնում է մի խմբի, որը «հետհեղափոխական շրջանում ստանձնեց պատասխանատվություն խաղաղ անհնազանդության պայքարի ճանապարհով բարձրաձայնելու մարդու իրավունքների կարևորագույն՝ առողջ միջավայրում ապրելու իր իրավունքի մասին։

Այս հեղինակավոր մրցանակը հանձնելով Ամուլսարի պահապաններին` մենք մեր համերաշխությունն ենք հայտնում նրանց, ովքեր ընտրում են կյանքը, այլ ոչ՝ հանքը։ Յուրաքանչյուր քաղաքացի, որը դուրս է գալիս պայքարի՝ հանուն մարդու իրավունքների, արժանի է խորագույն երախտագիտության և ակնածանքի։ Այս մարդիկ՝ ամիսներ շարունակ գտնվելով լուրջ ճնշումների, երբեմն նաև սպառնալիքների տակ, շարունակել են բարձրաձայնել իրենց համայնքի համար և ամբողջ մեր երկրի էկոհամակարգի համար կարևորագույն մի խնդիր՝ Ամուլսարի հանքավայրի շահագործման հետևանքով շրջակա միջավայրին հասցվող հնարավոր վնասների մասին, ու դա արվել է բացառապես սեփական ուժերի վրա հիմնված ինքնակազմակերպման ու բացառիկ էկոգիտակցության արդյունքում՝ սոլիդարության մեծ ալիք բարձրացնելով ներհայաստանյան և միջազգային հանրույթներում»։

Մրցանակը ստացավ Ջերմուկ քաղաքի բնակիչ Ահարոն Արսենյանը։ Նա մեկն է այն բնակիչներից, ովքեր 8 ամիս պայքարում են իրենց իրավունքների համար: Ստանալով մրցանակը՝ Ահարոնը նշեց, որ Ջերմուկի 3000 բնակիչներ ստորագրահավաքի միջոցով «հաստատել են, որ ողջ համայնքն է դեմ հանքարդյունահանմանը: Մենք որոշել ենք, որ Ամուլսարը հանք չի դառնալու և համայնքի ողջ երիտասարդությունն է ոտքի կանգնել այդ պահանջով: Չկա մի բան, որի դեմ պայքարի երիտասարդությունը ու չհաղթի»,- եզրափակեց մրցանակակիրը: