Նիկոլ Փաշինյանը հանձնարարեց բարձրացնել դպրոցների սեյսմակայունության բարելավման տեմպը

ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: ՀՀ կառավարության և Ասիական զարգացման բանկի միջև իրականացվող Սեյսմիկ անվտանգության բարելավման ծրագրի շրջանակում նոր դպրոցական շենքերի կառուցման համար ներկայումս առկա շենք շինությունների քանդման գործընթացը ՀՀ օրենսդրությամբ իրականացնելու անհրաժեշտությամբ պայմանավորված՝ կառավարությունն ընդունել է համապատասխան որոշում:

Տարածքային կառավարման և զարգացման նախարար Սուրեն Պապիկյանը նշեց, որ ծրագրի շրջանակում ներկայումս իրականացվում է Երևանի Մուրացանի անվան թիվ 18 հիմնական դպրոցի, Հակոբ Կոջոյանի անվան թիվ 15 կրթահամալիրի, Հ. Կարապենցի անվան թիվ 6 հիմնական դպրոցի և «Հերացի» ավագ դպրոցի ուժեղացման աշխատանքների նախագծման աշխատանքները: Առաջիկայում նախատեսվում է սկսել նաև Երևանի՝ Ղևոնդ Ալիշանի անվան թիվ 95 միջնակարգ դպրոցի և թիվ 116 հիմնական դպրոցի նախագծային աշխատանքները:

Քննարկման արդյունքում առաջարկվեց պահպանել դպրոցների ճակատային պատերը, ամրացնել դրանք և կառուցել նոր դպրոցներ նույն տեղում: Իսկ, Ղևոնդ Ալիշանի անվան թիվ 95 միջնակարգ և թիվ 116 հիմնական դպրոցները նախատեսվում է քանդել ամբողջությամբ, քանի որ տեխնիկական փորձաքննության եզրակացության համաձայն դրանք ամրացման ենթակա չեն:

Վերոնշյալ դպրոցների շինարարական աշխատանքները նախատեսվում է սկսել 2019 թվականին:

Ծրագրի պահանջներից է, որ 9 բալ ուժգնությամբ երկրաշարժի դեպքում շենքերը չքանդվեն, այս նպատակով նախագծերն անցնում են նաև միջազգային փորձաքննություն:

Կառավարության որոշման ընդունման դեպքում հնարավոր կլինի իրականացնել ծրագրի շրջանակում ընդգրկված թվով 6 դպրոցական շենք-շինությունների քանդման աշխատանքների իրականացումը՝ ՀՀ օրենսդրության պահանջներին համապատասխան:

Սուրեն Պապիկյանը նշեց, որ հաստատված կա ընդհանուր 46 դպրոց, և ընտրել են առավել խոցելիները:

Վարչապետ Նիկոլ Փաշինյանը նկատեց, որ 80 միլիոն դոլարի վարկային ծրագիր ունեն, ինչը ոչ բոլորին է բավարար: Նա հետաքրքրվեց, որ եթե գումար ունեն, դպրոցներ՝ ևս, ապա ինչո՞ւ են այս տեմպով առաջ գնում:

Փաշինյանը նշեց, որ տեմպը մեծացնելու խնդիր ունեն, իսկ նախարարը պատասխանեց, որ համաֆինանսավորման խնդիր կար:

«Ինչո՞ւ մենք ամեն շաբաթ մեկ դպրոցի, երեք-չորս դպրոցի հարց չենք լուծում, ինչո՞ւ բոլորի ուղղությամբ չենք գնում առաջ, պետք է առաջ գնալ առանց քննարկման, պետք է համաֆինանսավորման աղբյուրներ գտնել և գնալ առաջ»,- «Արմենպրես»-ի հաղորդմամբ, ասաց Նիկոլ Փաշինյանը: Բացի այդ, վարչապետը կարևորեց, որ որակի նկատմամբ վերահսկողությունը բարձր լինի: «Մի քանի տեղեր, որ մտնում ես, ավարտական կառույցի գլխին ոնց որ գրված է՝ պետական շինարարություն, այսինքն՝ պետական շինարարությունը մեր ընկալումներում չի փոխվում, որ պետական շինարարություն է, կարող մի քիչ ծուռ լինել, գույնն այն չլինել, իսկ երբ սեփական շինարարություն է, ամեն անկյունը տյունինգ արած պետք է լինի. այս տրամաբանությունը պետք է փոխենք: Պետք է փոխենք, թե հա դե դպրոց է, մեկ է՝ երեխեքը քանդելու են. դուք սարքեք, թող երեխեքը քանդեն, ոչ թե դուք քանդեք, երեխեքը քանդելու բան չունենան»,-կատակեց նա:

Կրթության և գիտության նախարար Արայիկ Հարությունյանն իր հերթին նկատեց, որ փորձը ցույց է տալիս, որ վերանորոգած դպրոցները երեխաները չեն քանդում:

Արտակարգ իրավիճակների նախարար Ֆելիքս Ցոլակյանն էլ հավելեց, որ սեյսմիկ կայունության խնդիր շատ դպրոցներ ունեն, և այդ թիվը տասն անգամ ավելի է, և 400-ի մասին է խոսքը: