Թուրքիայում ձերբակալվել են Սիրիա անցնել փորձած երեք ադրբեջանցիներ

Թուրքիայի Քիլիսի նահանգի Աշաղըբեյլերբեյլի գյուղի մոտ թուրք սահմանապահները ձերբակալել են Սիրիայի հետ Թուրքիայի սահմանն անլեգալ կերպով անցնելու փորձ կատարած 8 մարդու, որոնցից 3-ը Ադրբեջանի քաղաքացիներ են եղել: Ադրբեջանի ձերբակալված քաղաքացիների անունները չեն հրապարակվել: Ձերբակալվածները հանձնվել են ոստիկանությանը երկրից արտաքսվելու համար: Այս մասին  հայտնում է APA լրատվական գործակալությունը:

Թուրքական ոստիկանությունը հայտնել է, որ վերջին շրջանում ուժեղացվել է թուրք-սիրիական սահմանի վերահսկողությունը’ սահմանի ապօրինի հատումները կանխելու համար:

Ադրբեջանական ԶԼՄ-ներն ավելի վաղ հայտնել էին, որ Սիրիայում ապստամբների կողմից նախագահ Բաշար Ասադի դեմ կռվում են մեծ թվով Ադրբեջանի քաղաքացիներ, իսկ Սիրիայում ամբողջ պատերազմի ընթացքում ոչնչացվել են 200-ից ավելի ադրբեջանցիներ: 2013 թ. մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ հանուն հավատի) կատարել Սիրիայում:

Սիրիայում կառավարական ուժերի դեմ իսլամիստական խմբավորումների մարտերում 2014 թ. ընթացքում սպանված Ադրբեջանի քաղաքացի մոջահեդների թիվն արդեն գերազանցում է 80-ը: Թուրքիայում Ադրբեջանի դեսպանատունը հաստատել է ադրբեջանցի մոջահեդների’ Թուրքիայի վրայով Սիրիա անցնելու փաստը