Հրայր Թովմասյանը կողմնակից է Հայաստանում երթևեկության կանոնների խախտման համար վարորդական իրավունքից զրկելուն
Նմանատիպ
ՀՀ արդարադատության նախարարի պաշտոնակատար Հրայր Թովմասյանը Ազգային ժողովում անցկացվող խորհրադարանական լսումների ժամանակ ներկայացրեց «Վարչական իրավախախտումների մասին» նոր օրենսգրքի նախագծում ակնկալվող փոփոխությունների լուծումները: «Նոր օրենսգիրքը տասնյակ հարցերի հետ միասին պետք է լուծումներ գտնի ճանապարհային երթևեկության կանոնների խախտման համար նախատեսված վարչական պատասխանատվություններին: Նախ ագծի ընդհանուր մասը պատրաստ է, հիմա աշխատանքները գնում են հատուկ մասի վրա: Հուսանք, որ աշնանային նստաշրջանում ամողջական փաթեթը կներկայացվի ԱԺ քննարկմանը»,-«Արմենպրես»-ի հաղորդմամբ’ ասաց Հրայր Թովմասյանը:
Նրա խոսքով’ նոր օրենսգրքում ճանապարհային երթևեկության կանոնների խախտման համար անհրաժեշտ է պատժատեսակների շրջանակը ընդայնել ու ներառել թե զգուշացումը, թե տուգանքը և թե վարորդական իրավունքից զրկումը: «Գործող օրենսգրքում մենք ընդհանուր մասում ունենք զգուշացումը, տուգանքը, որոշակի իրավունքներից զրկումը, սակայն հատուկ մասում որևէ հոդվածով զգուշացում չունենք, այն ամբողջությամբ դուրս է եկել և մնացել է միայն տուգանքը և վարորդական իրավունքից զրկումը, որը պահպանված է մեկ-երկու հոդվածներում: Մնացած հովածներում ունենք բացառապես տուգանք ը որպես պատժատեսակ: Ժամանակին կոռուպցիոն ռիսկերը նվազեցնելու համար ենք գնացել դրան: Սակայն, գործնականում, վերլուծությունները ցույց են տալիս, որ տուգանքը ոչ միշտ է արդյունավետ միջոց հետապնդվող նպատակներին հասնելու համար»,-ասաց Հրայր Թովմասյանը’ հավելելով, որ լայն կիրառում պետք է տալ վարորդական իրավունքից զրկելուն:
Հաջորդ խնդիրը, որին անդրադարձավ Հրայր Թովմասյանը, սահմանված ժամկետում տուգանքները չվճարելու դեպքում դրանց կրկնապատկման, եռապատկման հարցն է: «Այս դեպքում մենք պետք է գտնենք այնպիսի գործիքակազմ, որ, մի կողմից’ այդքան էականորեն չմեծացվեն տուգանքի չափերը, որ տուգանքների անհամաչափության խնդիր չառաջանա: Մյուս կողմից’ մենք պետք է ունենանք արդյունավետ մեխանիզմներ, որ այս տուգանքները ճիշտ ժամանակին վճարվեն: Դրա լուծման օրինակ կարող է լինել վերահաս վտանգը, որ տուգանքը չվճարելու դեպքում իրավախախտը կզրկվի վարորդական իրավունքից»,-ասաց նա:
Նոր օրենսգրքում փոփոխությունների տեսանկյունից պատասխանատվության անհատականացման հարցն է բարձրացվում: «Ներկայում մենք անհատականացման հնարավորությունը չունենք, ինչը ևս կոռուպցիոն ռիսիկերից խուսափելու նպատակով է որդեգրվել: Մեզ մոտ հետևյալն է, եթե «Ա»-ն խախտում է իրականացնում,ապա նրա համար գործում է «Բ» պատժատեսակը, ու այստեղ հաշվի չի առնվում, թե ով է դա արել, ինչու, ինչ պարագաներում: Քննարկումների արդյունքում կարող ենք որոշել անհատականացման ինչպիսի մոտեցումներ կիրառել: Այս իմաստով մենք կարող ենք կիրառել տարբերակված մոտեցումներ»,-ասաց Հրայր Թովմասյանը’ հավելելով, որ կարելի է ներմուծել քրեական իրավունքում հայտնի, բայց վարչականում անհայտ հանրային աշխատանքի ինստիտուտը:
Նա նաև նշեց, որ փնտրվող լուծումները տարբեր շահագրգիռ կողմերի հետ աշխատանքների արդյունքում են իրենք ստանալու: «Հուսանք, որ այս քննարկումների արդյունքում կունենանք լուծումներ, որոնք, մի կողմից’կապահովեն մեր ճանապարհային երթևեկության անվտանգությունը, մյուս կողմից էլ’ կընդունվեն այնպիսի գործիքներ, որոնք կծառայեն մեր առջև դրված նպատակներին»,-եզրափակեց Հրայր Թովասյանը:
Ապրիլի 23-ին Ազգային ժողովում անցկացվում է «Ճանապարհային երթևեկության կանոնների խախտումների համար վարչական պատասխանատվությունը, ճանապարհային անվտանգության ապահովման միջոցների կիրառումը և ավտոկայանատեղերի գործունեության կազմակերպումը» թեմայով խորհրդարանական լսումները:
Հետևեք մեզ նաև Telegram-ում