Քեսաբահայերից ոմանք ապրում են իրենց բնակարաններում, որոշ ընտանիքներ հեռացել են Լիբանան

Քեսաբահայերից ոմանք ապրում են իրենց բնակարաններում, որոշ ընտանիքներ հեռացել են Լիբանան

Քեսաբի բնակիչների մեծ մասն արդեն բնակվում են իրենց տներում: Այս մասին «Արմենպրես»-ի հետ զրույցում տեղեկացրեց Քեսաբի հայ Կաթողիկե եկեղեցու վարդապետ Նարեկ Լուիսյանը՝ ավելացնելով, որ էլեկտրականությունը և ջուրն ընդհատումներով լինում են Քեսաբում: Կանայք շարունակում են մաքրություններ կատարել և որքան հնարավոր է բնակարաններ ը կարգի բերել:

Վարդապետը նշեց, որ Քեսաբի որոշ ընտանիքներ, ամբողջովին կորցնելով իրենց տները, ունեցվածքը, կարողությունները, հեռացել են այնտեղից և մեկնել Լիբանան: Նրա խոսքով՝ մի քանի քեսաբահայեր, ովքեր գործիքներ ունեն, հերկում են արտերը, որոշները հավաքում են բերքը և տանում Լաթաքիա վաճառելու՝ այդպիսով վաստակելով փոքր գումարներ: Ինչ վերաբերում է Քեսաբի ուղղությամբ նետվող ռումբերին, վարդապետը նշեց, որ ռումբերն այժմ ավելի հազվադեպ են նկատվում:

Հունիսի 15-ին Քեսաբի ազատագրումից հետո բնօրրան վերադարձած քեսաբահայերը ծանր վիճակում են հայտնվել: Քեսաբցիների բոլոր բնակարաններն անխտիր կողոպտվել են: Բնակարաններից որոշները զրկվել են բոլոր տեսակի տեխնիկայից՝ սառնարանից, լվացքի մեքենայից, խոհանոցային անհրաժեշտ պարագաներից, որոշները հրկիզվել են, մյուսների վրա ռումբ է ընկել և այնտեղ հնարավոր չէ ապրել:

Քեսաբի շրջանի վրա հարձակումն սկսվել էր մարտի 21-ին Թուրքիայի սահմանի մի քանի կետերից: Հարձակումն իրականացրել են «Ջաբհա ան Նուսրա» և «Ջեյշ ալ Իսլամ»խմբավորումները Թուրքիայի կառավարության անմիջական աջակցությամբ:

Հետևեք մեզ նաև Telegram-ում