«Գագիկ Ծառուկյանը տնտեսական դեմք է, չէի ուզենա, որ օլիգարխը նախագահ լիներ».Սոս Գիմիշյան
Նմանատիպ
«Քրիստոնեա-ժողովրդական վերածնունդ» կուսակցության նախագահ Սոս Գիմիշյանի դիտարկմամբ այսօրվա քաղաքական էլիտան իրեն սպառել է, ուստի երկրում պետք է լուրջ փոփոխություններ տեղի ունենան, բայց անցնցում՝ ոչ մայդանյան: Գիմիշյանը պատրաստ է ընդունել քաղաքական կուրսի ցանկացած փոփոխություն, նրա համար կարևորը ոչ թե անձն է, այլ, թե ինչ է նա ուզում և ինչպես է ուզածն իրականացնում: Նրա գնահատմամբ՝ եթե ամեն ընտրությունից հետո իշխանություն փոխվի, այդ պահին իշխանության ղեկին լինողը կմտածի բարի համբավ թողնելու մասին:
Անդրադառնալով հոկտեմբերի 10-ի եռյակի համատեղ հանրահավաքին, քաղաքական գործիչը նկատեց, որ այնտեղ մի մասը նախկին իշխանավորներ էին, մյուսները ժամանակին գործող իշխանության մաս են կազմել, ավելին, 2008-ի մարտի 1-ին իշխանության հետ միասին ժողովրդի դեմ զենք են կիրառել, երրորդն էլ ժողովրդի մեծ մասի քվեն ստացավ, բայց որևէ առաջխաղացման չկարողացավ հասնել: Ըստ այդմ՝ Գիմիշյանը չի նկատել այն վստահությունը, որը կցանկանար տեսնել, իսկ ԲՀԿ նախագահի ելույթ չունենալը ճիշտ քայլ էր, հատկապես, երբ մեկ օր առաջ նախագահ դառնալու ցանկություն էր հայտնել:
«ԲՀԿ-ի կեցվածքն ինձ համար անհասկանալի է մնում և այն, թե ինչպես են ՀԱԿ-ն ու ԲՀԿ համագործակցում: Լավ կլիներ, որ որպես հրաշալի քառյակ իրենց ժողովուրդը գնահատեր, ոչ թե իրենք իրենց: Մեծ չի փոփոխությունը` Դաշնակցությունը գնաց, Ժողովրդական կուսակցությունը միացավ»,– լրագրողների հետ հանդիպմանը շեշտեց Գիմիշյանն՝ արձագանքելով Լևոն Տեր-Պետրոսյանի գնահատականին, թե հրաշալի քառյակը շարունակում է մնալ այդպիսին:
«Քրիստոնեա-ժողովրդական վերածնունդ» կուսակցության նախագահը ևս որոշ քաղաքագետների և քաղաքական գործիչների նման եռյակում քաղաքական հստակ օրակարգ չի տեսնում, բայց անկախ իր ունեցած վերաբերմունքից հարթակում կանգնած մարդկանց նկատմամբ, կցանկանար, որ գործընթացը շարունակվեր: Իսկ այն, ըստ նրա՝ հնարավոր է, եթե դրսից օժանդակող ուժ լինի, մյուս կողմից դա կախված է, թե առաջիկա հանրահավաքներում ինչ կասի և կանի եռյակը կամ քառյակը:
Անդրադառնալով ԲՀԿ առաջնորդ Գագիկ Ծառուկյանի 2018-ին նախագահ դառնալու հնարավորություններին, Գիմիշյանը նկատեց, որ յուրաքանչյուր ՀՀ քաղաքացի առաջադրվելու իրավունք ունի, այլ հարց է, թե որքանով է նա համապատասխանում այդ պաշտոնին:
«Գագիկ Ծառուկյանը տնտեսական դեմք է, ես կուզենային մի այնպիսի երկրում ապրել, որտեղ երկրի նախագահը լիներ շատ ավելի քաղաքական դեմք: Նա օլիգարխ է, ինչը նշանակում է, որ օրենքը շրջանցելով տնտեսական գործունեություն է վարել: Ուստի կրկնում եմ՝ ես չէի ուզենա, որ օլիգարխը երկրի նախագահ լիներ, այլ, որ նա շարունակեր իր տնտեսական գործունեությունը, բայց օրինական դաշտում: Այսօր նախագահի պլանկան մենք այնքան ցածր ենք իջեցրել, որ մեր երկրում յուրաքանչյուրն էլ կարող է հավակնել այդ աթոռին: Ավելին, ինչքան անխելք, անբարոյական, քցող, քծնող, այնքան մեծ շանսեր ունի: Եթե մարդն ազնիվ է, ապա այնպես են անում, որ նա գնա երկրից: Կամ՝ եթե մի քիչ է գողանում՝ բռնում են, եթե շատ՝ խորհրդարան տանում»,-շարունակեց նա՝ նկատելով, որ կուսակցությունները պետք է գնահատվեն ոչ թե ըստ չափսերի, այլ մտքի և ծրագրերի որակի:
«Եթե ես ունենամ փող և նպատակ, կարող եմ ավելի մեծ կուսակցություն սարքել, քան ԲՀԿ-ն ու ՀՀԿ-ն են»,-եզրափակեց նա:
Հետևեք մեզ նաև Telegram-ում