«Մեծահարուստի ընդդիմադիր դառնալու օրինակ ունեցել ենք, հիմա կունենանք նոր նախադեպ». Վահագն Խաչատրյանը՝ Ծառուկյանի ընդդիմադիր դառնալու մասին
Նմանատիպ
Այն պահից, երբ ԲՀԿ-ը դուրս եկավ կոալիցիայից, տեսակետներ հնչեցին, որ օլիգարխը չի կարող ընդդիմադիր լինել, Գագիկ Ծառուկյանն ինքն էլ մոտ մեկ տարի առաջ բացառեց իր ղեկավարած կուսակցության ընդդիմադիր դառնալը՝ հռչակելով այլընտրանք: Մեկ շաբաթ առաջ ԲՀԿ առաջնորդը Ազատության հրապարակում հրավիրված հանրահավաքին արտաբերեց իշխանափոխություն բառը, իսկ օրերս հերթական հարցազրույցը տվեց, որտեղ վստահեցնում է, թե հետդարձի ճանապարհ չունի, որ գնալու է այնքան, մինչև Հայաստանում իրավիճակը փոխվի, որ համաժողովրդական շարժումը պետք է մեծացվի և այլն: Բայց սրանից հետո դարձյալ կարծիքներ եղան, թե բացառվում է, որ օլիգարխը դառնա ընդդիմադիր՝ աչքի տակ ունենալով հնարավոր զրկանքները: Ամեն դեպքում հնարավո՞ր է, որ ՀՀ-ում նման բանի ականատես լինենք:
ՀԱԿԿ անդամ, Երևանի նախկին քաղաքապետ Վահագն Խաչատրյանը Times.am–ի հետ զրույցում հիշեցրեց, որ աշխարհում նման շատ-շատ փորձեր են եղել, իսկ Հայաստանում մեծահարուստի՝ Խաչատուր Սուքիասյանի ընդդիմադիր դառնալու օրինակ ենք ունեցել:
«Հիմա նոր նախադեպ կունենանք, որը սկսված է»,-շեշտեց Վահագն Խաչատրյանը՝ խոսելով օլիգարխի՝ Գագիկ Ծառուկյանի ընդդիմություն դառնալու հնարավորությունից և ակնարկելով, թե դա կարող է վարակիչ լինել:
Երևանի նախկին քաղաքապետը նշեց, թե շատ կցանկանար, որ մեծահարուստը, օլիգարխն ընդդիմադիր լինի և դա բնական դիտվի, որ նրանք բոլոր թևերում ներկայացված լինեն, ինչը կհանգեցնի բիզնեսի կախվածություն չունենալուն: Միաժամանակ, Վահագն Խաչատրյանն ակնարկեց, որ քաղաքական գործունեության հիմքում անկախ ամեն ինչից պետք է ոչ թե բիզնես շահը լինի, այլ գաղափարը, որպեսզի չունենանք պրակտիկա, երբ իշխանությունն օգտագործվում է հարստանալու համար:
Ինչ վերաբերում է Գագիկ Ծառուկյանի մեկ այլ մտքին, թե Հայաստանում մեկընդմիշտ պետք է վերանա բռնի ուժով փայ մտնելու ավանդույթը, տնտեսագետը նկատեց՝ սա ակտուալ հարց է, պետք է բիզնես նոր կանոններ մշակվեն, չպետք է օրենքից դուրս կիսվելու պարտադրանք լինի:
Մարիամ Պետրոսյան
Հետևեք մեզ նաև Telegram-ում