Այս տարի կարևոր առաջընթաց է գրանցվել հայ-ադրբեջանական խաղաղության գործընթացում. Բայրամով
Կարդացեք նաև
ԱՊԱ գործակալության փոխանցմամբ՝ տարվա արդյունքներին նվիրված մամուլի ասուլիսում Ադրբեջանի արտաքին գործերի նախարար Ջեյհուն Բայրամովը հայտարարել է, որ 2025 թվականին Ադրբեջանի արտաքին քաղաքականությունը, որը վարվում էր Ալիևի ղեկավարությամբ, կենտրոնացած էր ազգային շահերի հետապնդման վրա։
Բայրամովը նշել է, որ Ադրբեջանը բարձրացրել է իր դիվանագիտական ներկայացուցչության մակարդակը։ Նրա խոսքով, Ադրբեջանն այժմ հուսալի միջազգային գործընկեր է։
Բայրամովն ընդգծել է, որ հարևան պետությունների հետ հարաբերությունները արտաքին քաղաքականության առաջնահերթություն են։ Նախարարը հավելել է, որ 2025 թվականին, նոր աշխարհաքաղաքական իրողություններին համապատասխան, կարևոր հաջողություններ են գրանցվել և նշանակալի քայլեր են ձեռնարկվել հայ-ադրբեջանական խաղաղության գործընթացում. «Խաղաղության խթանումը, միջազգային օգնության գործունեությունը, միջնորդական ջանքերը և միջազգային միջոցառումների անցկացումը նպաստել են մեր երկրի հեղինակության հետագա աճին»։
Նա նշել է, որ Հարավային Կովկասում ի հայտ են եկել նոր իրողություններ. «Մենք դրա առաջին տարրերը տեսանք 2025 թվականին: Այս աշխատանքը կշարունակվի 2026 թվականին»։
Բայրամովը հավելել է, որ Հայաստանի և Ադրբեջանի միջև խաղաղության համաձայնագրի ստորագրման համար անհրաժեշտ են «Հայաստանի սահմանադրության փոփոխություններ և TRIPP-ի պարտավորությունների լիարժեք կատարում». «Վերջերս տեղի են ունեցել երկու երկրների քաղաքացիական հասարակության ներկայացուցիչների փոխադարձ այցելություններ: Գաբալայում տեղի է ունեցել նաև սահմանազատման հանձնաժողովի նիստ»,-ասել է նա։
Նախարարը նշել է, որ անկախությունից ի վեր Ադրբեջանի և Հայաստանի միջև նման բան տեղի չի ունեցել. «Հետևաբար, մենք ներկայումս զրոյից ինչ-որ բան ենք ստեղծում։ Հայաստանի խնդրանքը վերաբերում էր նավթամթերքին, և ադրբեջանական կողմը ընդունել է այն»։
Ջեյհուն Բայրամովը կարծում է, որ Ադրբեջանի և Հայաստանի միջև առևտուրը հնարավոր է նաև այլ ոլորտներում. «Մենք չենք կարող խոսել երկու երկրների միջև ռազմական առևտրի մասին, բայց մի շարք այլ ոլորտներում առևտուրը հնարավոր է»։
«Իմ այցը Հայաստան հնարավոր է, եթե դա պահանջեն Ադրբեջանի ազգային շահերը»,-ամփոփել է նա։
Հետևեք մեզ նաև Telegram-ում