Գեղարքունիքի մարզի Մարտունի քաղաքի բժշկական կենտրոնում Ռուսաստանի Դաշնության եւ ՀՀ կառավարությունների փոխհամագործակցության արդյունքում ստեղծվում է իմունոֆերմենտատիվ հետազոտությունների լաբորատորիա:
Ինչպես «Արմենպրես»-ին տեղեկացրեց «Մարտունու բժշկական կենտրոն» ՓԲԸ տնօրեն Վարդան Կարապետյանը, լաբորատորիայի ստեղծման ծրագրի ընդհանուր արժեքը կազմում է 780 հազար ռուսական ռուբլի, որն ամբողջությամբ ներդնելու է ռուսական կողմը: «Լաբորատորիայի ստեղծման նպատակով առանձնացվել է համապատասխան տարածք: Լաբորատորիայում կիրականացվի բարձրակարգ հետազոտություններ, այն ձեռք կբերի մարզային նշանակություն, քանի որ նման երկրորդ ծառայություն առայժմ մարզի բուժհաստատությունները չունեն: Տեխնիկական վերազինման հերթական ծրագրի իրականացումից հետո մեզ մոտ բուժսպասարկման որակը նկատելիորեն կբարձրանա»,- նշեց Վարդան Կարապետյանը:
Իմունոֆերմենտատիվ հետազոտությունների լաբորատորիան Մարտունու բժշկական կենտրոնում գործել կսկսի այս տարվա դեկտեմբերի կեսերից:
Խոսրով Խլղաթյան
