Համաշխարհային նորաձևության ամենահեղինակավոր տներից մեկի՝ «Հերմես»-ի թողարկած «Երևանի տառեր» (Lettres d’Erevan) անվանումով մետաքսյա թիկնոցներն առաջին անգամ նոյեմբերի 12-ին ներկայացվել են Միացյալ Նահանգների Արևմտյան ափում: Ինչպես հաղորդում է «Արմենպրես»-ը, այս մասին տեղեկացնում է «Ասպարեզ»-ը:
«Հերմես»-ի` հայոց այբուբենը ներկայացնող այս նախաձեռնությունը նվիրված է «Պրոտեստանտ Ֆրանսիա-Հայաստան Սոլիդարիթի» (Solidarit՛e protestante France-Armeni՛e-(SFPA)) բարեգործական կազմակերպության 25-րդ տարեդարձին: Սահմանափակ քանակով արտադրված թիկնոցների վաճառքի ողջ հասույթը տրամադրվելու է SFPA-ի՝ Հայաստանում իրականացվող մարդասիրական և մշակութային ծրագրերին:
«Երևանի տառեր» թիկնոցը ձևավորել է Կարեն Պետրոսյանը՝ իր ստեղծագործությունը ձոնելով Մեսրոպ Մաշտոցին ու Մատենադարանին: Կարմիր և սպիտակ գունային ֆոներով մետաքսի վրա հայկական տառերը ներկայացված են հին ձեռագրերի ոճով: Մեջտեղում` զարդարված կամարի ներքո, խորհրդածող իմաստունի պատկեր է, ով ձեռքում բռնել է գիտության գործիքները՝ գրիչ ու բաց գիրք:
«Չափազանց ուրախ եմ, որ այս թիկնոցների միջոցով SFPA-ն կկարողանա շարունակել Հայաստանում մարդկանց օգնելու իր ծրագրերը», – իր ուղերձում նշել է «Հերմես»-ի գեղարվեստական ղեկավար Պիեր Ալեքսիս Դումասը, ով էլ հղացել է թիկնոցների ստեղծման գաղափարը:
«Ամեն տարի «Հերմես»-ը որևէ բարեգործական կազմակերպության հետ ստեղծագործական նախագիծ է իրականացնում: Այս տարի նրանք ընտրել էին մեզ, և մենք նպատակ ունեինք արվեստի միջոցով ներկայացնել հայկական ինքնության տարրերից որևէ մեկը: Արվեստագետ Կարեն Պետրոսյանը սիրով արձագանգել էր Դումասի առաջարկին, «Պետրոսյան խավիար»-ի սեփականատեր Արմեն Պետրոսյանն էլ ցանկություն հայտնեց աջակցել թիկնոցները հանրությանը ներկայացնելու հարցում: Սա մեզ համար իսկապէս մեծ պատիվ է, քանզի մեր կազմակերպությունը փոքր է և ծրագրերն իրականացնում է սահմա նափակ միջոցներով՝ դրամահավաքների շնորհիվ: Այս նախագծի արդյունքում մենք կկարողանանք շարունակել Հայաստանի և Արցախի մանուկների համար մեր բարեգործական տարբեր ծրագրերը»,- նշել է SFPA բարեգործական կազմակերպության գլխավոր քարտուղար Քլեմենտ Հելիխ Փրաքինը:
Նշենք, որ «Երևանի տառեր» (Lettres d’Erevan) թիկնոցներն արտադրվելու են սահմանափակ քանակով` յուրաքանչյուրը 330 եվրո արժողությամբ: Թիկնոց կարելի է պատվիրել այցելելով SFPA-ի կայքէջ:
SFPA-ն հիմնադրվել է 1990թ.-ին, Փարիզում, Սպիտակում տեղի ունեցած երկրաշարժից հետո՝ մասնավորապես մանկատներին, կարիքավոր երեխաներին ու տարեցներին օգնելու նպատակով: Տարին երկու անգամ այս կազմակերպությունը կազմակերպում է բացահայտման նպատակ ունեցող ուղևորություններ` Հայաստանի և հայ ժողովրդի մասին իրազեկելու նպատակով: «Հերմես»-ը երկրորդ անգամ է, որ համագործակցում է բարեգործական այս կազմակերպութեան հետ. տասը տարի առաջ ստեղծվել էր «Հայկական այգիներ» (Les Jardins d’Armeni՛e) թեմայով թիկնոց:
