Քրդական ինքնապաշտպանական ուժերը «Իսլամական պետությունից» ազատագրել են սիրիա-թուրքական սահմանին գտնվող Քոբանի քաղաքի մեծ մասը: Այս մասին հայտնել են քաղաքի բնակիչները:
Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, նրանց խոսքով, քաղաքի կենտրոնում գտնվող 6 շինություններն ազատագրվել են ահաբեկիչներից: Բացի այդ, առգրավվել են մեծ քանակությամբ զենքեր և զինամթերք:
Տեղեկություններ կան, որ ծայրահեղականների ձեռքում մնացել է քաղաքի 20 տոկոսը:
Տեղական աղբյուրների փոխանցմամբ, ռազմական գործողությունների ընթացքում 23 ահաբեկիչներ են սպանվել: Քոբանիի հարավային և հարավ-արևելյան հատվածներում շարունակվում են թեժ բախումները: ԻՊ-ի անդամները փոձում են վերահսկողություն հաստատել քաղաքի վրա:
Քրդական աղբյուրների տեղեկացմամբ, 65 օր շարունակվող բախումների ընթացքում ահաբեկիչների զոհերի և վիրավորների թիվը գերազանցում է 3 հազարը:
Ավելի վաղ տեղեկություններ էին ստացվել, որ ԱՄՆ-ը և իր դաշնակից երկրները վերջին մի քանի օրում ավելի քան 30 օդային հարվածներ են հասցրել Սիրիայում և Իրաքում «Իսլամական պետության» դիրքերի ուղղությամբ: Քոբանի քաղաքի ուղղությամբ 11 օդային հարված է ուղղվել:
