Ամերիկան Քրիստափոր Կոլումբոսից առաջ մահմեդականների կողմից հայտնաբերվելու մասին Թուրքիայի նախագահ Ռեջեփ Թայիփ Էրդողանի անհեթեթ հայտարարությունը Իսպանիայից հետո ծիծաղով է ընդունվել նաեւ Գերմանիայում:
Ինչպես հաղորդում է «Արմենպրես»-ը, Էրդողանի այդ հայտարարությանը գերմանական «Թագեսցայթունգ» թերթը պատասխանել է ծաղրանկարով:
Ծաղրանկարում պատկերված է, որ Կոլումբոսը Կուբա հասնելու ժամանակ տեսնում է «Էրդողանն այստեղ էր»` Թուրքիայի դրոշով գրություն եւ զարմանում: Ծաղրանկարի տակ էլ գրված է. «1492 թվականին Ամերիկան Կոլումբոսը չի հայտնագործել»:
Լատինական Ամերիկայի մահմեդական կրոնական առաջնորդների գագաթնաժողովի վերջում ունեցած ելույթում Էրդողանն ասել էր, թե 1178 թվականին այսինքն` Կոլումբոսից 314 տարի առաջ Ամերիկայի աշխարհամաս են հասել մահմեդական ծովայինները: Նրա խոսքով` Կոլումբոսը նույնիսկ իր հուշերում խոսել է Կուբայի ափեր հասնելու ժամանակ սարի գլխին մզկիթ տեսնելու մասին:
Ինքնության հաստատման խնդիր ունեցող Թուրքիայի նախագահի այդ անհեթեթ «հայտնագործությունը» հումորով է ընդունվել աշխարհում:
