Թուրքիայի նախագահ Ռեջեփ Թայիփ Էրդողանի` Ամերիկան մուսուլմանների կողմից հայտնաբերվելու մասին անհեթեթ հայտարարությունը շարունակում է վերջինիս ծիծաղի առարկա դարձնել: Տարբեր լրատվական և ժամանցային պարբերականներ չեն դադարում անդրադառնալ թեմային` միաժամանակ այն պատկերելով ծաղրանկարներում: Ինչպես հաղորդում է «Արմենպրես»-ը` վկայակոչելով թուրքական Demokrathaber.net-ը, այս անգամ թուրքական Penguen կոմիկ շաբաթաթերթի հերթական համարը լույս է տեսել Էրդողանի ծաղրանկարով:
Նկարում Էրդողանը մատիտով Լեոնարդո դա Վինչիի հայտնի Մոնա Լիզայի նկարի վրա մզկիթ է նկարում: Շապիկին գրված են հետևյալ տողերը. «Նախագահ Էրդողանը, ով հայտարարել էր, որ Ամերիկա մայրցամաքը հայտնաբերել են մուսուլմանները, այլ ոչ թե Քրիստափոր Կոլումբոսը, ասել է. «Կուբայի այդ սարի վրա մզկիթ կսազի»»:
Ավելի վաղ Էրդողանի հայտարարությանը ծաղրանկարով պատասխանել էին իսպանական և գերմանական պարբերականները:
Լատինական Ամերիկայի մահմեդական կրոնական առաջնորդների գագաթնաժողովի վերջում ունեցած ելույթում Էրդողանն ասել էր, թե 1178 թվականին այսինքն` Կոլումբոսից 314 տարի առաջ Ամերիկայի աշխարհամաս են հասել մահմեդական ծովայինները: Նրա խոսքով` Կոլումբոսը նույնիսկ իր հուշերում խոսել է Կուբայի ափեր հասնելու ժամանակ սարի գլխին մզկիթ տեսնելու մասին:
