Ինչպես հայտնի է` «Շրջանառության հարկի մասին» օրենքում կառավարության նախաձեռնած փոփոխությունները, որոնք նախատեսում էին որոշ չափով կրճատել ստվերը շրջանառության հարկ վճարողների շրջանում, դժգոհության մեծ ալիք բարձրացրեցին: Կառավարությունը, հաշվի առնելով տնտեսվարողների բողոքները, նրանց մի քանի ամիս ժամանակ տվեց` ապրանքների գույքագրման ժամկետը տեղափոխելով մինչև փետրվարի 1-ը: Օրենքում ամրագրված փոփոխությունները նախատեսում էին այնպիսի առանցքային ընթացակարգեր, որոնք հնարավորություն կտային բացահայտել տնտեսվարող սուբյեկտների գործունեության իրական ծավալները, ինչն էլ կբարձրացներ թափանցիկությունն ու հնարավորություն կտար կրճատել ստվերը:
Սակայն հայրենի տնտեսվարողները կառավարության այս քայլից հետո էլ շարունակեցին մտահոգություններ հայտնել, որ հարկային մարմիններն իրենց վերապահված իրավունքով կարող են մի քանի այցելությունների շնորհիվ մեծ խնդիրներ ստեղծել իրենց համար: Ըստ տնտեսվարողների` մեկ անգամ զգուշացվելուց և երկրորդ անգամ տուգանվելուց հետո իրենք կանգնած կլինեն կամ ԱԱՀ վճարման դաշտ անցնելու, կամ` ընդհանրապես գործունեությունը դադարեցնելու վտանգի առաջ:
Այսօր` նոյեմբերի 27-ին վարչապետ Հովիկ Աբրահամյանը կառավարության նիստի մեկնարկի հենց սկզբում հայտարարեց, որ մտահոգված է տնտեսվարողների համար ավելորդ խնդիրներ չստեղծելու հարցով և հանձնարարեց հարկային ստուգումները յուրաքանչյուր տարի անցկացնել միայն մեկ անգամ: «Հանձնարարում եմ յուրաքանչյուր օրացուցային տարում ՀՀ հարկային մարմինների կողմից օպերատիվ հետախուզական միջոցառումները սահմանափակել մեկ անգամով, մեկից ավելի անգամ ստուգումները վերապահելով միայն բացառիկ դեպքերում խիստ ծանրակշիռ փաստարկների պարագայում՝ վարչապետի թույլտվությամբ», – կարգադրել է վարչապետը:
Նման քայլի արդյունքում, փաստորեն, տնտեսվարողները հստակ երաշխիք են ստանում, որ իրենց գործունեության համար ոչ մի արհեստական խնդիրներ կառավարությունը` ի դեմս հարկային մարմինների, չի ստեղծի: Առայժմ հայտնի չէ, թե հաջորդ անգամ ինչից են պատրաստվում դժգոհել տնտեսվարողները, սակայն ակնհայտ է, որ կառավարությունը և մասնավորապես` վարչապետը բավական բարյացկամ են տրամադրված փոքր ու միջին ձեռնարկատերերի նկատմամբ:
Նորայր Բադալյան
