Պրահայում Ադրբեջանի դեսպանատան դիմաց Ադրբեջանում իրավապաշտպանների ձերբակալությունների դեմ բողոքի ակցիա է անցկացվել:
Ակցիան կազմակերպել է չեխական NESEHNUTI կազմակերպությունը: Մասնակիցները ձեռքներին բռնել են Ադրբեջանում ձերբակալված իրավապաշտպանների լուսանկարները և ջահեր, ինչպես նաև պարզել «Անազատությունն Ադրբեջանում այրում է մեզ» բովանդակությամբ պաստառ:
Ակցիայի մասնակիցները Ադրբեջանի իշխանություններից պահանջել են անհապաղ ազատ արձակել երկրում կալանավորված մոտ 100 իրավապաշտպաններին: «Մենք այրում ենք ադրբեջանական նավթը, բայց այդ երկրում անազատություններն այրում են մեզ», -հայտարարել է ակցիայի մասնակից Պետեր Տկաչը:
NESHNUTI-ին նաև Ադրբեջանի նախագահին ուղղված ստորագրահավաք է անցկացրել, որով նրան կոչ է արել ազատ արձակել իրավապաշտպաններ Ռասուլ Ջաֆարովին և Ինթիգամ Ալիևին: Նրանք նաև կոչ են արել Եվրախորհրդարանի պատգամնավորներին` պաշտպանել Ադրբեջանում ձերբակալված իրավապաշտպաններին ազատ արձակելու իրենց պահանջը:
Միջազգային կազմակերպությունների տվյալներով` Ադրբեջանում ներկայում 98 իրավապաշտպաններ կան ձերբակալված:
Հիշեցնենք, որ երեկ ի նշան ադրբեջանցի քաղբանտարկյալների նկատմամբ համերաշխության` Կիևում մարդու իրավունքների հարցերով զբաղվող նորվեգական «Մարդու իրավունքների տուն» հիմնադրամը բողոքի ակցիա է կազմակերպել Ադրբեջանի դեսպանատան դիմաց:
Ավելի վաղ նույն հիմնադրամը նմանօրինակ բողոքի ակցիա էր կազմակերպել նաև ուկրաինական Չերնիգով քաղաքում:
«Մարդու իրավունքների տուն» նորվեգական հիմնադրամը 2009 թվականին բացվել էր նաև Բաքվում, սակայն երկու տարի անց իշխանությունները փակել էին գրասենյակը և չեղյալ էին համարել նրա գործունեությունը:
