ԼՂՀ վարչապետ Արա Հարությունյանը հրավիրված կառավարության նիստում շնորհակալություն է հայտնել աշխարհասփյուռ հայությանը, որի մասնակցության շնորհիվ նոյեմբերի 27-ին տեղի ունեցած «Հայաստան» համահայկական հիմնադրամի հեռուստամարաթոնի ընթացքում հանգանակվել է ավելի քան 12 մլն ԱՄՆ դոլար: Ինչպես հաղորդում է «Արմենպրես»-ը վկայակոչելով Karabakh-open-ը, Արցախի վարչապետը երախտագիտություն հայտնելով ոչ միայն գումարային, այլեւ բարոյական աջակցության համար՝ կոչ է արել գործընկերներին եւս պարտավորություն ստանձնել եւ ակտիվ մասնակցություն ունենալ համահայկական դրամահավաքին:

«Հեռուստամարաթոն 2014» արդյունքն ուղղվելու է Վարդենիս- Մարտակերտ ճանապարհի շինարարության շարունակմանը, իրագործվելու են նաեւ առանձին ծրագրեր, կառուցվելու են համայնքային կենտրոններ եւ ուռուցքաբանական հիվանդանոց:

Հայաստանն Արցախին միացնող Վարդենիս-Մարտակերտ այլընտրանքային ճանապարհի ընդհանուր արժեքը 31-32 միլիոն դոլար է, 10 միլիոն դոլար համահայկական ջանքերով արդեն փոխանցվել է ճանապարհի կառուցմանը, մոտ 4 միլիոն դոլարն էլ տրամադրել է ՀՀ կառավարությունը Հայաստանի մասը կառուցելու համար: Ճանապարհն ավարտին հասցնելու համար հարկավոր է շուրջ 17 միլիոն ԱՄՆ դոլար:

Այս պահի դրությամբ` ճանապարհի հայաստանյան մասում (14 կմ) գրեթե ավարտին են հասցվել թե հողային, թե ասֆալտապատման աշխատանքները: Լեռնային Ղարաբաղի մասում հողային աշխատանքները մոտենում են ավարտին