Այսօր լրագրողների հետ հանդիպմանը՝ պատասխանելով Times.am-ի հարցին, թե նիկոլ Փաշինյանի Սերժ Սարգսյանին իմպիչմենտ հայտնելու նախաձեռնությունը մինի-լյուստրացիայի փո՞րձ է ընդդիմության դաշտում, թե դրա կարիքը չկա, «Ժառանգության» առաջնորդ Րաֆֆի Հովհաննիսյանն ասաց, որ կողմ է Փաշինյանի առաջարկին, քանի որ ունենք չընտրված նախագահ, բայց խնդիրն այն է, որ պատգամավորը լուրջ բացթողում է թույլ տվել՝ իմպիչմենտի հիմնաղբյուրը չկա. «Նիկոլի հիմնավորումներում բացակայում է հենց այս կետը, որ ընտրությունները կեղծված են և նա չընտրված նախագահ է, բացակայում է հիմնաղբյուրը, որը կարող էր ուժեղացնել նախաձեռնությունը: Խոսք չկա նաև Մադրիդյան սկզբունքների մասին և այլ կարևոր հարցերի: Եթե ինձ դիմած լիներ, մեկ-երկու ուղղություն կտայի, ինձ չի դիմել, խմբակցություններին է դիմել: Ինչևէ, հաջողություն եմ մաղթում, խմբակցությունը կորոշի այնպես, ինչպես կորոշի»:
Այս համատեքստում Րաֆֆի Հովհաննիսյանը հիշեցրեց, որ նախընտրական շրջանում թեպետ Նիկոլ Փաշինյանն իրեն չի աջակցել, բաց իր հաղթանակից հետո եկել և առաջարկել է իր զորակցությունը. «Ի տարբերություն ուրիշների, որոնք ուշացումով եկան ու պահանջեցին, որ իշխանությունը իրենց հետ կիսվի, նա եկավ ու ասաց, որ ոչ մի պատասխանատվություն չի վերցնի, ափսոս»:
