«FourFourTwo». Մխիթարյանն ընդգրկվել է տարվա 100 լավագույն ֆուտբոլիստների ցանկում
Նմանատիպ
«FourFourTwo» պարբերականը կազմել է 2014 թվականի լավագույն ֆուտբոլիստների 100-յակը: 100 լավագույնների շարքում 84-րդ տեղն է զբաղեցրել Հայաստանի ազգային հավաքականի և Դորտմունդի «Բորուսսիայի» կիսապաշտպան Հենրիխ Մխիթարյանը:
««Միքի» մականունը ստացած ֆուտբոլիստը երկրպագուների սիրելին դարձավ իր առաջին իսկ մրցաշրջանում խփած կարևոր գոլերի շնորհիվ, որոնց թվում էր Չեմպիոնների լիգայի շրջանակում «Արսենալի» դեմ խաղում (2:1) գերմանացիների առաջին գոլը: 2014 թվականի ընթացքում Հենրիխ Մխիթարյանը Բունդեսլիգայում 162 դրիբիլինգ է իրականացրել, ինչը 50-ով ավելի է, քան «Բորուսսիայի» որևէ այլ ֆուտբոլիստի ցուցանիշը»,-ասվում է պարբերականի մեկնաբանության մեջ:
Ըստ «FourFourTwo»-ի փորձագետների` 2014 թվականի լավագույն ֆուտբոլիստը Պորտուգալիայի հավաքականի և Մադրիդի «Ռեալի» առաջատար Կրիշտիանու Ռոնալդուն է: Նրան հաջորդում է Գերմանիայի հավաքականի և «Բավարիայի» ֆուտբոլիստ Ֆիլիպ Լամը, իսկ լավագույն եռյակը եզրափակում է Արգենտինայի հավաքականի և «Բարսելոնայի» հարձակվող Լիոնել Մեսսին: Լավագույն տասնյակը ներկայացված է տեսանյութում, իսկ տարվա լավագույն 100-յակին կարող եք ծանոթանալ այս հղմամբ:
