Թուրքիայի իշխող կուսակցությունը, հավանական է, կոալիցիա կստեղծի ազգայնականների հետ

Խորհրդարանական ընտրություններում անհրաժեշտ ձայներ հավաքել չկարողանալու պատճառով կոալիցիոն կառավարություն ստեղծել հարկադրված Թուրքիայի իշխող «Արդարություն եւ զարգացում» կուսակցությունը (ԱԶԿ) կարծես գտել է խնդրի լուծման ճանապարհը:

Ինչպես հաղորդում է «Արմենպրես»-ը` վկայակոչելով թուրքական «Հուրիեթ» թերթը, խորհրդարան անցած Ազգայնական շարժում կուսակցության (ԱՇԿ) հետ կոալիցիա ստեղծելուն դրական մոտեցող ԱԶԿ-ն խոչընդոտները վերացնելու ուղղությամբ գործողություններ է սկսել:

ԱԶԿ-ն ավելի հետաքրքրված է խորհրդարան մտած Ժողովրդահանրապետական (CHP) եւ քրդական Ժողովուրդների դեմոկրատական (HDP) կուսակցությունների համեմատ ԱՇԿ-ի մասնակցությամբ կոալիցիա ստեղծելու մեջ: Ըստ տեղեկությունների` ԱԶԿ-ի շտաբում քննարկումներ են սկսվել ԱՇԿ-ի կողմից նրա առաջ դրված երեք հիմնական պայմանների ուղղությամբ:

Թուրքիայի կենտրոնական ընտրական հանձնաժողովը հունիսի 18-ին հայտարարել է հունիսի 7-ին անցկացված խորհրդարանական ընտրությունների վերջնական արդյունքները: Այդ արդյունքների համաձայն` Թուրքիայի խորհրդարանում ԱԶԿ-ը զբաղեցրել է 258, ԺՀԿ-ն` 132, ԱՇԿ-ն` 80 եւ ԺԴԿ-ն` 80 պատգամավորական աթոռներ:

Հայտնի է դարձել, որ Թուրքիայի նոր խորհրդարանն առաջին նիստը կգումարի հունիսի 23-ին, որտեղ նորընտիր պատգամավորների երդման արարողությունից հետո այդ երկրի նախկին վարչապետ Ահմեթ Դավութօղլուին կհանձնարարվի նոր կառավարություն ստեղծել: