Այս տարի Հայաստանում ցանքատարածություններն ավելացել են 18.5 հազար հեկտարով

Գյուղատնտեսական մշակաբույսերի ցանքատարածությունները 2015 թվականին նախորդ տարվա համեմատությամբ ավելացել են 18.5 հազար հեկտարով և կազմել 351.3 հազար հեկտար՝ վարելահողերի օգտագործման մակարդակը հասցնելով 78.5 տոկոսի: 2010-2014 թվականներին ցանքատարածություններն ավելացել էին շուրջ 50 հազար հեկտարով: «Արմենպրես»-ի փոխանցմամբ` այս մասին սեպտեմբերի 9-ին կայացած մամուլի ասուլիսի ժամանակ հայտնեց ՀՀ գյուղատնտեսության նախարար Սերգո Կարապետյանը: «Հացահատիկային մշակաբույսերի ցանքատարածությունները գերազանցում են նախորդ տարվա մակարդակը 5.8 տոկոսով կամ 11 հազար հեկտարով, իսկ ցորենի ցանքատարածությունների աճը կազմել է 4.7 տոկոս, կամ 5 հազար հեկտար: Բացի այդ` այս տարի զգալիորեն` 9.4 տոկոսով կամ շուրջ 2.5 հազար հեկտարով, ավելացել են բանջարանոցային մշակաբույսերի տարածքները, 3 տոկոսով կամ գրեթե 1000 հեկտարով ընդլայնվել են բոստանային մշակաբույսերի տարածքները, ավելի քան 3 տոկոսով կամ շուրջ 1000 հեկտարով ավելացել են կարտոֆիլի, 3.2 հազար հեկտարով կամ 4.1 տոկոսով` կերային մշակաբույսերի ցանքատարածությունները»,- հայտնեց նախարարը:

Նրա խոսքով` սերմնաբուծության, սերմապահովության բնագավառում և գյուղատնտեսության մեջ օժանդակության ծրագրերը նպաստել են հացահատիկային մշակաբույսերի ցանքատարածությունների ավելացմանը և հացահատիկային տնտեսության ինտենսիվացման մակարդակի բարձրացմանը: «Հացահատիկային մշակաբույսերի արտադրության ծավալները 2014 թվականին գերազանցել են 2010 թվականի մակարդակը 81 տոկոսով, իսկ բերքատվությունը բարձրացավ շուրջ 54 տոկոսով: Ցորենի արտադրության ծավալները նշված ժամանակահատվածում ավելացել են ավելի քան 84 տոկոսով, իսկ բերքատվությունը` 52.4 տոկոսով»,- նշեց Սերգո Կարապետյանը:

Նախարարը հավելեց, որ 2015 թվականին զգալի աշխատանքներ են իրականացվել նաև ջերմատնային տնտեսության զարգացման ուղղությամբ: Ներկայում ջերմատների ընդհանուր տարածքը կազմում է 770 հա, որից ապակեպատ` 270, թաղանթապատ` 500 հեկտար: «Ժամանակակից տեխնոլոգիաներով հագեցած ջերմատները կազմում են 85 հեկտար, մինչև տարեվերջ Կոտայքի և Արարատի մարզերում կկառուցվեն ևս շուրջ 40-50 հեկտար արդիական տեխնոլոգիաներով հագեցած ջերմատներ: Ջերմատնային տնտեսության զարգացման արդյունքում ընթացիկ տարվա գարնանից հանրապետության շուկաներում իրացվել է հիմնականում տեղական արտադրության լոլիկ և վարունգ»,- ասաց Սերգո Կարապետյանը: