Երկուշաբթի օրը կմեկնարկի Աժ հերթական քառօրյան: Այս անգամ կմասնակցի՞ Գագիկ Ծառուկյանն Աժ աշխատանքներին, թե՞ էլի շատ զբաղված է և կամ կբացակայի երկրից’ «Հրապարակը» փորձել է ճշտել Ծառուկյանի մամլո գրասենյակից: «Այս պահին ես չեմ տիրապետում պրն Ծառուկյանի աշխատանքային ծանրաբեռնվածության գրաֆիկին, չեմ կարող հստակ ասել՝ կմասնակցի՞ խորհրդարանական քառօրյային, թե՞ ոչ»: Ձեր ասածից կարո՞ղ ենք եզրակացնել, որ չի մասնակցի: «Ո´չ, չեք կարող»,- ասաց Իվետա Տոնոյանը: Իսկ ինչպիսի՞ն են ԲՀԿ-ի և հատկապես Գագիկ Ծառուկյանի մոտեցումները 2013-ի պետական բյուջեին, որի նախագիծն Աժ-ում արդեն շրջանառության մեջ է՝ հաջորդ հարցն է ուղղել թերթը: «Քանի որ այն բավականին ծավալուն փաստաթուղթ է, և հանգամանալից ուսումնասիրության կարիք ու անհրաժեշտություն ունի, ապա այս պահին ԲՀԿ-ում ընթանում են ուսումնասիրության աշխատանքներ, առաջիկայում ԲՀԿ խորհրդարանական խմբակցությունն այդ առնչությամբ կարտահայտի իր տեսակետը, որն էլ, բնականաբար, կլինի նաև Գագիկ Ծառուկյանի տեսակետը»: Կարո՞ղ ենք եզրակացնել, որ ինչպես 2011-ի բյուջեի կատարողականը, այս մի քննարկումը ևս, ԲՀԿ մասով, սահուն կանցնի’ թերթի հարցին Տոնոյանը պատասխանել է. «Ո´չ, չեք կարող»: