Երիտասարդների սխրանքներն առաջնագծում վկայում են, որ Հայաստանը ճիշտ ուղու վրա է. Կորյուն Նահապետյան

Զինվորական ծառայության հանդեպ լուրջ վերաբերմունքը, բանակում բարոյահոգեբանական վիճակի բարելավումը, 18-20 տարեկան երիտասարդների սխրանքներն առաջնագծում վկայում են այն մասին, որ գտնվում ենք ճիշտ ուղու վրա: «Արմենպրես»-ի հաղորդմամբ` այս մասին Ազգային ժողովում մեկնարկած խորհրդարանական լսումների ժամանակ հայտարարեց ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանը:

«Զորակոչի կազմակերպման ոլորտում բարեփոխումների շարունակականությունն ապահովելու համար Զինապարտության մասին օրենքի բարեփոխմանն ուղղված քայլեր են կատարվում: Մասնավորապես, պաշտպանության նախարարության կողմից մշակվել ու շրջանառության մեջ է դրվել նոր օրենքի նախագիծ, որը մոտ ժամանակներս կներկայացվի ԱԺ քննարկմանը: Այն նախատեսում է նոր մոտեցումներ, որոնք ուղղված են լինելու զորակոչի արդյունավետության բարձրացմանը»,- ասաց Կորյուն Նահապետյանը:

Պատգամավորի խոսքով` լսումների միջոցով ցանկանում են վեր հանել զորակոչի նախապատրաստման ու կազմակերպման ընթացքում ի հայտ եկող խնդիրները, լսել առաջարկություններ ու փորձել դրանք լուծել:

Կորյուն Նահապետյանը կարևորեց դպրոցում «Նախնական զիվորական պատարստություն» առարկայի դասավարման արդյունավետության բարձրացումը, բացի այդ` նա խոսեց զորակոչի անցկացման թափանցիկության, այն վերահսկելի դարձնելուն ուղղված քայլերի մասին, որոնց շնորհիվ հասարակության շրջանում մեծացել է վստահության մակարդակն այդ գործընթացի նկատմամբ:

ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախաձեռնությամբ նոյեմբերի 23-ին ընթանում է խորհրդարանական լսումներ՝ «Հայաստանի Հանրապետությունում նախազորակոչային պատրաստության եւ զորակոչի կազմակերպման խնդիրները» թեմայով: