ՌԴ օդուժը ոչնչացրել է սիրիական ընդդիմության հայտնաբերած ԻՊ-ի ռազմաբազան և 320 զինյալ

Վերջին մեկ օրում  Սիրիայում  ռուսական ավիախումբը կատարել է  59 մարտական թռիչք՝ թիրախավորելով  Հալեպում, Իդլիբում, Լաթաքիայում,  Ռաքքայում,  Համայում, Հոմսում  գտնվող ԻՊ-ի 212 օբյեկտ:

ՌԴ պաշտպանական գերատեսչությունից հայտնում են, որ ահաբեկիչները կրել են և մարդկային,  և  նյութական կորուստներ: Մասնավորապես՝ ոչնչացվել է ավելի քան 320 զինյալ, 34 միավոր զրահապատ և ավտոմոբիլային տեխնիկա,  այդ թվում՝ 2 տանկ, 1 ԲՄՊ, 15 ջիպ: Իսկ ԻՊ-ի ֆինանսական աղբյուրների վերացման նպատակով ռուսական Սու-34 ռմբակոծիչը Դեյր Զորում  ոչնչացրել է 94 վառելիքատար, իսկ Հասեկե շրջանում՝ 15 նավթատարից բաղկացած շարասյուն: 

Արդեն Հալեպում Սու-24 ռմբակոծիչը ԻՊ-ի 10 զինյալ և խոշոր տրամաչափի գնդացիրներով զինված 3 ավտոմեքենա է ոչնչացրել, Հոմսում՝ ահաբեկիչների քողարկված   բազան: ԻՊ-ի ստորգետնյա թաքստոցներում հայտնաբերվել է հրամանատարական  կետ, զինամթերքի պահեստ և  զորանոց, որոնք ոչնչացվել են  ԲԵՏԱԲ-500 ավիառումբերի գործադրմամբ:

ՌԴ պաշտպանության նախարարությունը  տեղեկացնում է, որ Իդլիբում ևս   Սու-25 գրոհիչի միջոցով  ռազմաբազա  է ոչնչացվել:

«Այդ օբյեկտի տեղակայման մասին վկայությունները մենք ստացել ենք սիրիական ընդդիմությունից։ Բաղդադի տեղեկատվական կենտրոնի միջոցով տեղեկությունը ստուգելուց և բազայի կոորդինատները ճշտելուց հետո Սու-25 գրոհիչի հարվածից նշված բազան ոչնչացվել է»,-տեղեկացնում են ռազմական գերատեսչությունից: