Իշխանությունները պատրաստ են քննարկել ընդդիմության հնչեցրած յուրաքանչյուր առաջարկություն. վարչապետ

ՀՀ իշխանությունները պատրաստ են քննարկել Ընտրական օրենսգրքի նախագծի վերաբերյալ յուրաքանչյուր առաջարկություն, որը կհնչեցնի ընդդիմությունը: Այս մասին լրագրողների հետ զրույցում անդրադառնալով Ընտրական օրենսգրքի շուրջ քննարկումներին` նշեց ՀՀ վարչապետ Հովիկ Աբրահամյանը:

«Արմենպրես»-ի փոխանցմամբ` լրագրողներից մեկի հարցին` իշխանությունները պատրա՞ստ են զիջումների, որ համաձայնեցին բանակցել Ընտրական օրենսգրքի շուրջ, վարչապետը պատասխանեց. «Բանակցել չի նշանակում զիջել: Եվ շատ լավ մշակույթ է ձևավորված, մենք շարունակում ենք այդ մշակույթը: Բանակցենք, լսենք ողջամիտ առաջարկություններ»:

Դիտարկմանը, թե պատգամավոր Լևոն Զուրաբյանը հայտարարել է, որ իրենք փորձելու են իշխանություններին ճնշել, որպեսզի նրանք գնան սկզբունքային զիջումների, վարչապետը արձագանքեց. «Պիտի խնդրեմ, որ մշակույթն ու ճնշումը տարանջատենք: Լավ մշակույթ է ձևավորված, և մենք պատրաստ ենք քննարկել յուրաքանչյուր ողջամիտ առաջարկություն, որը կհնչեցվի ընդդիմության կողմից: Մենք ականջալուր ենք, եթե լինի ողջամիտ առաջարկություն, անպայման կընդունենք: Մենք շատ լուրջ ենք վերաբերում օրենսդրությանը վերաբերող յուրաքանչյուր ողջամիտ առաջարկության»:

Հարցին, թե Լևոն Զուրաբյանն ակնարկել է, թե Հովիկ Աբրահամյանը ֆինանսավորել, հովանավորել է «Ոչ»-ի շտաբը, վարչապետը նշեց, որ եթե Զուրաբյանը հստակեցնի իր ակնարկը, ինքը կպատասխանի: