«Հարավկովկասյան երկաթուղի» ՓԲԸ-ն հորդորում է պահպանել երթևեկության կանոնները երկաթուղային գծանցներում

Նորագավիթ-Մասիս հատվածի կարգավորվող գծանցում «ՎԱԶ-2106» ավտոմեքենան մարտի 17-ին ժամը 23:03-ին բախվել է 1621 բեռնատար գնացքի ВЛ10 №631 էլեկտրաքարշին: Ավտոմեքենայի վարորդը՝ խախտելով կանոնները, շրջանցել է արդեն փակված ուղեփակոցը և անտեսելով հերթապահի կարգադրությունները` հայտնվել երկաթուղային գծերում, բեռնատար գնացքի առաջ: Չնայած արգելակմանը՝ բախումից հնարավոր չէր խուսափել: Մեքենայի վարորդը հոսպիտալացվել է:

Բախման արդյունքում և վերապրած սթրեսի հետևանքով՝ գնացքի մեքենավար Արսեն Տերտերյանը չկարողացավ շարունակել աշխատանքը, իսկ ոսկու հանքաքար տեղափոխող գնացքն ուշացվեց 1 ժ 15 ր, ինչը լրացուցիչ նյութական վնաս պատճառեց ընկերությանը: Այս մասին «Արմենպրես»-ին տեղեկացրին «Հարավկովկասյան երկաթուղի» ՓԲԸ-ից:

«Հարավկովկասյան երկաթուղի» ՓԲԸ կրկին հիշեցնում է գծանցների հատման կանոնների պահպանման անհրաժեշտության մասին, հորդորում է լինել ուշադիր ու զգոն: Վարորդների անփութության և թույլ տված սխալների գինը կարող է լինել մարդու կյանքն ու առողջությունը:

Պահպանվող երկաթուղային գծանցները պետք է հատել միայն հերթապահի թույլտվությամբ, իսկ չպահպանվողները՝ միայն համոզված լինելով, որ անցումը լինելու է անվտանգ, չփորձել անցնել գծանցը գնացքի առջև, քանի որ դա կարող է ծանր հետևանքների բերել:

Անհրաժեշտ է հիշել, որ երկաթուղային տրանսպորտը հնարավոր վտանգի դեպքում չի կարող անհապաղ կանգնել. արգելակման դեպքում մարդատար էլեկտրագնացքի արգելակման ուղին կազմում է 800 մետր, իսկ բեռնատարինը՝ մոտ 1000 մետր: Սակայն վտանգի դեպքում որոշիչ դեր են խաղում վայրկյանները և հաշված քայլերը:

Իր կողմից ընկերությունն անվտանգության կանոնների մասին տեղեկացնում է երկաթուղու մոտակայքում գտնվող համայնքների բնակիչներին: