Վարչապետը կոչ արեց Մարտին Սարգսյանին միջոցների հարցով կառավարությունից ակնկալիք չունենալ

Կառավարության նիստում վարչապետ Հովիկ Աբրահամյանն Անշարժ գույքի կադաստրի պետական կոմիտեի նախագահ Մարտին Սարգսյանից հետաքրքրվեց՝ նախորդ տարի կոմիտեն իր բյուջեն որքանո՞վ է թերակատարել: Ի պատասխան՝ Սարգսյանը նշեց, որ մոտ 12 տոկոսով: «Դուք այս տարի պլանավորել եք հավաքագրել 4 միլիարդ 304 մլն դրամ, իսկ եթե չհավաքագրեք այդ գումարները, ի՞նչ ենք անելու: Կառավարությունից ակնկալիք չունենաք»,- «Արմենպրես»-ի հաղորդմամբ՝ ասաց Հովիկ Աբրահամյանը:

Սարգսյանն ասաց, որ եթե չհավաքագրվեն այդ միջոցները, ապա առաջնային խնդիրները կկարգավորեն, իսկ եթե գումարները հավաքագրվեն, ապա նախատեսված բոլոր ծրագրերը կիրականացվեն: Միաժամանակ, վարչապետը հիշեցրեց Մարտին Սարգսյանին, որ նախորդ տարի պետբյուջեից միջոցներ են վերցրել՝ հետ վերադարձնելու պայմանով:

Ի դեպ, գործադիրը հաստատեց Անշարժ գույքի կադաստրի պետական կոմիտեի զարգացման 2016 թվականի համալիր ծրագիրը հաստատելու մասին նախագիծը: