Վրաստանի և Աջարիայի վարչապետները ներկա են եղել Վիրահայոց թեմի եկեղեցիներում Սուրբ Հարության տոնի պատարագներին

Մեր Տեր Հիսուս Քրիստոսի Հրաշափառ Հարության տոնը մարտի 27-ին Թբիլիսիում, Սամցխե-Ջավախքում, Քվեմո Քարթլիի տարածաշրջանում, Բաթումում նշվել է հավատացյալ հոծ բազմության մասնակցությամբ:

Հավատացյալներով լեփ-լեցուն Թբիլիսիի Սուրբ Գևորգ առաջնորդանիստ և Սուրբ Էջմիածին եկեղեցիներում կատարվեց ժամերգություն, Անդաստան, այնուհետև մատուցվել է Զատկական Սուրբ և Անմահ Պատարագ:

Ինչպես տեղեկացրին Հայ Առաքելական եկեղեցու Վիրահայոց թեմից, Բաթումի «Սուրբ Փրկիչ» եկեղեցում Զատկական Սուրբ Պատարագ է մատուցել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Սրբազան Հորը ողջունելու և Սուրբ Պատարագին մասնակցելու համար Բաթումի հայոց եկեղեցի էին եկել Աջարիայի Ինքնավար Հանրապետության վարչապետ Արչիլ Խաբաձեն, Բաթումի քաղաքապետ Գիորգի Երմակովը, Աջարիայի կրթության, մշակույթի և սպորտի նախարար Գիորգի Թավամաիշվիլին, Բաթումում Իրանի Իսլամական Հանրապերո ւթյան հյուպատոս Ահմադ Ռեզա Արզզհանին, Բաթումիում ՀՀ Գլխավոր հյուպատոս Արամ Գրիգորյանը:

Հավարտ Սուրբ Պատարագի, Ալեքսանդր Մանթաշովի անվան կրթության, մշակույթի և երիտասարդության կենտրոնում Թեմակալ Առաջնորդը կատարել է նկարիչ Հրաչ Սեչինյանի աշխատանքների ցուցահանդեսի բացումը:Թբիլիսիի Սուրբ Գևորգ առաջնորդանիստ եկեղեցում Սուրբ Պատարագին ներկա էին Վրաստանի վարչապետ Գիորգի Կվիրիկաշվիլին, Վրաստանի Կրոնի հարցերով պետական գործակալության նախագահ Զազա Վաշախմաձեն, Վրաստանի խորհրդարանի պատգամավոր Ռուսլան Պողոսյանը, Վրաստանի բռնագրավված տարածքների և բռնի տեղաշարժվածների ու փախստականների նախարար Սոզար Սուբարը, Թբիլիսիի Ժողովրդական ժողովի նախագահ Գիորգի Ալիբեգաշվիլին, Վրաստանում ՀՀ դեսպանության դիվանագետներ, համայնքային պաշտոնյաներ, կրթության և մշակույթի գործիչներ, բազում հայորդիներ:

Հընթացս Սուրբ Պատարագի Պատարագիչ Տեր Սամվել քահանա Թորոսյանը ընթերցել է Ն.Ս.Օ.Տ.Տ. Գարեգին Բ Ամենայն հայոց կաթողիկոսի զատկական պատգամը:

Հավարտ Սուրբ և Անմահ Պատարագի, Քվեմո Քարթլիի տարածաշրջանի հայկական համայնքների հոգևոր հովիվ Տեր Խորեն վարդապետ Հովհաննիսյանը շնորհավորել է ներկաներին Քրիստոսի Հարության հրաշազարդ տոնի առիթով, և հանուն Վիրահայոց թեմի առաջնորդի ողջունել Վրաստանի վարչապետ տիար Գիորգի Կվիրիկաշվիլիին և ներկա պաշտոնյաներին, ի մասնավորի ասելով. «Կան հարյուրավոր ժողովուրդներ, որ պետականություն չունեն, իսկ վիրահայերս՝ երկուսն ունենք: Մենք հավասարապես սիրում ենք Հայաստանի Հանրապետությունը և Վրաստանը: Մենք հպարտ ենք, որ հայ ենք և հպարտ ենք, որ ազատ, անկախ Վրաստանի քաղաքացիներ ենք…»:

Հատկանշական է, որ ողջ Ավագ շաբաթվա ընթացքում և Սուրբ Զատկի օրը քույր եկեղեցիների հավատացյալներ՝ ղպտիներ, ասորիներ և հնդիկ մալաբարներ, սիրով իրենց մասնակցությունն են բերել Թբիլիսիի հայոց եկեղեցիների ծիսական արարողություններին:Հիսուս Քրիստոսի Սուրբ Հարության տոնին նվիրված Սուրբ Պատարագներ են մատուցվել Վիրահայոց թեմի բոլոր եկեղեցիներում։