«Ժողովուրդ». Թիկնապահին դանակահարված տեսնելուց հետո, Գուրգեն Արսենյանը ստիպված է եղել հանել զենքը
Նմանատիպ
«Ժողովուրդ»-ին մանրամասներ են հայտնի դարձել նախորդ տարվա սեպտեմբերին ՄԱԿ նախագահ Գուրգեն Արսենյանի հետ տեղի ունեցած միջադեպից: Ըստ այդմ 2015 թվականի սեպտեմբրի 19-ին՝ առավոտյան 7-ի սահմաններում, Երևանի Մաշտոցի պողոտայում տեղի ունեցած ծեծկռտուքի ընթացքում դանակահարվել է ԱԺ պատգամավոր, ՄԱԿ նախագահ Գուրգեն Արսենյանի թիկնապահ Ավետիս Գալստյանը։
«Ժողովուրդ»-ը տեղեկացել է, որ ամեն ինչ սկսվել էր փողոցային մի կռվից, որը նկատելով՝ ԱԺ պատգամավորն անտարբեր չի անցել, կանգնեցրել է ավտոմեքենան, փորձել կարգի հրավիրել մի երիտասարդի գետնին տապալած ու դաժան ծեծի ենթարկող քառյակին։ Սակայն ագրեսիվ երիտասարդները, թողնելով իրենց «զոհին», անմիջապես թիրախավորել են պատգամավորին, հայհոյել նրան, որից հետո Արսենյանի օգնականը գործի է դրել բռունցքները։
Ծեծկռտուքի ընթացքում Անդրանիկ Գաբրիելյանը դանակահարել է Ավետիսին, որից հետո պատգամավորը ստիպված է եղել մեքենայից հանել զենքը։
Բարեբախտաբար, բանը կրակոցներին չի հասել, և օգնականին շտապ հիվանդանոց հասցրած Գուրգեն Արսենյանը «Ժողովուրդ»-ի հետ զրույցում հատուկ շնորհակալություն է հայտնել ՀՀ ոստիկանությանը՝ «խուլիգանական դրսևորումներով աչքի ընկած երիտասարդներին օպերատիվ կերպով վնասազերծելու համար»։
Թերթը հավելել է, որ մինչ Մաշտոցի պողոտայի ծեծկռտուքը, նույն երիտասարդները Հանրապետության հրապարակի տարածքում մի անցորդի են ծեծի ենթարկել ու կողոպտել:
Հետևեք մեզ նաև Telegram-ում