ՄԱԿ-ի ԱԽ-ն դատապարտեց ԿԺԴՀ-ի կողմից բալիստիկ հրթիռի արձակումը

ՄԱԿ-ի Անվտանգության խորհուրդը դատապարտել է Փենյանի կողմից բալիստիկ հրթիռի արձակումը եւ այն գնահատել որպես կազմակերպության բանաձեւերի հերթական լուրջ խախտումը, տեղեկացնում է «Արմենպրես»-ը՝ հղում անելով Agence France Presse-ին:

«ՄԱԿ-ի ԱԽ-ի անդամները վճռականորեն դատապարտում են ԿԺԴՀ-ի կողմից ապրիլի 23-ին սուզանավից բալիստիկ հրթիռի արձակումը… ԿԺԴՀ-ի կողմից ՄԱԿ-ի ԱԽ-ի բանաձեւերի եւս մեկ լուրջ խախտումը»,- ՄԱԿ-ի հայտարարությունից մեջբերում է արել գործակալությունը:

ՄԱԿ-ի ԱԽ-ն հորդորում է Փենյանին՝ «ձեռնպահ մնալ ՄԱԿ-ի ԱԽ-ի համապատասխան բանաձեւերը խախտող հետագա գործողություններից եւ կատարել իր պարտականությունները դրանց շրջանակներում, ներառյալ բալիստիկ հրթիռների ծրագրի հետ կապված ցանկացած գործունեության դադարեցումը», նշվում է փաստաթղթում:

ԿԺԴՀ-ի իշխանությունները ապրիլի 24-ին հայտարարել են սուզանավից բալիստիկ հրթիռի հաջող արձակման մասին, որն իրականացվել է երկրի առաջնորդ Կիմ Չեն Ընի ղեկավարությամբ, հաղորդել Է ՌԻԱ Նովոստին: