Նադալը կրկնել է Գիլյերմո Վիլասի ռեկորդը

Իսպանացի թենիսիստ Ռաֆայել Նադալը երեկ հաղթել է Բարսելոնայի մրցաշարում՝ եզրափակչում առավելության հասնելով ճապոնացի Կեի Նիսիկորիի նկատմամբ։

Սա Նադալի 9-րդ հաղթանակն էր այս մրցաշարում։ Այսպիսով, Բարսելոնայի մրցաշարը երրորդն է Նադալի կարիերայում, որում նա հաղթել է 9 անգամ։ Ավելի վաղ նա 9-ական անգամ հաղթել էր «Ռոլան Գարրոսի» և Մոնտե Կարլոյի մրցաշարերում։ Բարսելոնայում հաղթանակը Նադալին բերել է կարիերայի 69-րդ տիտղոսը։ Նա միակ թենիսիստն է, ում հաջողվել է մեկ մրցաշարում հաղթել 8-ից ավելի անգամ։

Բացի այդ, իսպանացի թենիսիստը հավասարվել է Գիլյերմո Վիլասին գրունտային ծածկով կորտերում նվաճած տիտղոսների թվով։ Այժմ երկու մարզիկներն էլ գրունտի վրա նվաճած 49-ական մրցանակ ունեն։