Տարեսկզբից Միջերկրական ծովով Եվրոպա են ժամանել ավելի քան 181 հազար միգրանտներ

Տարեսկզբից Միջերկրական ծովով Եվրոպա են ժամանել ավելի քան 181 հազար միգրանտներ ու փախստականներ: Դրա հետ մեկտեղ ավելի քան 1200 մարդ զոհվել կամ անհետ կորել է եվրոպական երկրներ հասնելու փորձ կատարելիս: Այդ մասին ինչպես տեղեկացնում է «Արմենպրես»-ը, ապրիլի 26-ին հայտնել է Միգրացիայի միջազգային կազմակերպությունը (ՄՄԿ):

ՄՄԿ-ի գնահատումներով՝ 2016 թվականին ծովով Եվրոպա են ժամանել 181 հազար 476 միգրանտներ ու փախստականներ, ասված է Ժնեւում տարածված հաղորդագրության մեջ: Զոհվածների կամ անհետ կորածների թիվը հասել է 1232-ի:

Տարեսկզբից Հունաստան է ժամանել 154 հազար 491 մարդ, Իտալիա՝ 25 հազար 894, Իսպանիա՝ 1063, Կիպրոս՝ 28 հոգի:

ՄՄԿ-ն ուշադրություն Է դարձնում ապրիլին Հունաստանի ուղղությամբ միգրացիոն հոսանքի «կտրուկ նվազմանը»: Ապրիլի 22-ից մինչեւ 24-ը հունական կղզիներում գրանցվել է ընդամենը 223 միգրանտների ու փախստականների ժամանում, հաղորդել է ՏԱՍՍ գործակալությունը: