14 երկրների բարձրագույն վերահսկման մարմիններ Հայաստանում քննարկում են արդյունավետ աուդիտի հարցեր

Բարձրագույն վերահսկիչ մարմինների միջազգային կազմակերպության (INTOSAI) Ազգային առանցքային ցուցանիշների հանձնաժողովի 9-րդ նիստն անցկացվում է Հայաստանում` Ծաղկաձոր զբոսաշրջային քաղաքում, որին մասնակցում է 14 երկրի 40 պատվիրակ: «Արմենպրես»-ի փոխանցմամբ` նման բարձր մակարդակի մասնագիտական միջոցառում Հայաստանում անցկացվում է առաջին անգամ: Հանձնաժողովի ղեկավարությունն իրականացնող Ռուսաստանի Դաշնության հաշվիչ պալատի աուդիտոր Տատյանա Մանույլովան, բացելով նիստի աշխատանքները, շնորհակալություն հայտնեց հայկական կողմին ջերմ հյուրընկալության համար: Անդրադառնալով նիստի օրակարգային հարցերին` ռուս պաշտոնյան նկատեց, որ համաշխարհային տնտեսության աճի նվազման ներկայիս միտումները, նավթի ցածր գները, արդիական են դարձնում միջազգային հանրության ջանքերի համատեղումն աշխարհում կայուն զարգացում ապահովման համար: «ՄԱԿ-ի նոր լայնածավալ օրակարգը, որն աշխարհի վերաձևավորման նպատակն ունի, ներառվում է նպատակներ ու խնդիրներ, որոնք ուղղված են տնտեսական աճին, սոցիալական ինտեգրմանն ու շրջակա միջավայրի պաշտպանությանը: Նշյալ հարցերում ավելի ու ավելի կարևորվում է ազգային կառավարությունների, վիճակագրական ծառայությունների և բարձրագույն վերահսկման մարմինների դերակատարությունը»,- ասաց Տատյանա Մանույլովան:

Այս իմաստով պաշտոնյան կարևոր համարեց ՄԱԿ-ի և INTOSAI-ի միջև համագործակցության հուշագիրը, որն ուղղված է պետական կառավարման ակտիվության, արդյունավետության, հաշվետվողականության ու թափանցիկության բարձրացմանը` բարձրագույն վերահսկիչ մարմինների աշխատանքի ամրապնդման միջոցով:

ՀՀ վերահսկիչ պալատի նախագահ Իշխան Զաքարյանի խոսքով` չնայած վերոնշյալ հանձնաժողովը ամենաերիտասարդներից է, բայց միջազգային փորձագետների գնահատմամբ` ամենահեռանկարայինն է: «Ներկայում, երբ համաշխարհային, տարածաշրջանային և ազգային տնտեսությունների առջև ծառացել են մի շարք բարդ խնդիրներ, այս հանձնաժողովի դերն ավելի է մեծանում, քանզի աուդիտի արդյունքները կարող են օգտագործվել նաև երկրի համար առավել կարևոր ռազմավորությունների մշակման ու իրականացման գործում»,-հայտնեց պաշտոնյան:

Նրա խոսքով` ներկայում ոլորտի մասնագետները հանգում են հարցերի, թե ինչպես տնօրինել պետությունների, ժողովուրդների ժառանգությունը, ինչպես պահպանել ու բազմապատկել դրանք, ինչպիսին են լինելու երկրները տասը-քսան տարի հետո: «Վստահ եմ, որ բոլորն են այսօր մտածում, որ արդյունավետ վերահսկման միջոցով վաղվա օրն ավելի լավը կլինի, երկրներն էլ կդառնան տնտեսապես ավելի հզոր ու կայուն»,- ասաց Իշխան Զաքարյանը` հավելելով, որ բարձրագույն վերահսկիչ մարմինների աշխատանքն այս հարցում պետք է լինի բոլոր ոլորտներում առկա խնդիրների և դրանց լուծման մ ասին բարձրաձայնումն ու հաջողությունների արձանագրումը:

«Արտաքին բացասական ազդակները շարունակվում են, իսկ մենք` վերահսկիչներս, աշխատանքի բարձր տեմպը պահելու լուրջ խնդիր ունենք: Վերահսկողության սլաքները անհրաժեշտ է կենտրոնացնել ինչպես բյուջետային մուտքեր ապահովելու, այնպես էլ ծախսերի կատարման արդյունավետության խնդիրների վրա»,-ավելացրեց Իշխան Զաքարյանը:

Անդրադառնալով ազգային առանցքային ցուցանիշի աուդիտի համակարգի ստեղծմանը` Զաքարյանը նկատեց, որ դա բարձրագույն վերահսկիչ մարմիններին թույլ է տալիս իրականացնել ռազմավարական բնույթի աուդիտներ, որոնց միջոցով հնարավոր է պարզել երկրի ռազմավարական ծրագրերի իրագործման աստիճանը: Նշելով, որ շուրջ քսան երկիր, այդ թվում` Նիդերլանդները, Նորվեգիան, Շվեյցարիան, Անգլիան, Լեհաստանը, Ճապոնիան, ունի առանցքային ազգային ցուցանիշների հստակ համակարգ, հայ պաշտոնյան անհրաժեշտ համարեց փորձի փոխանակման ակտիվացումը, միմյանց աջակցմանն ուղղված համատեղ ծրագրերն ու աշխատանքները:

Բացման խոսքով հանդես եկավ նաև Բրազիլիայի պատվիրակ Ավգուստո Նարդեսը որպես աշխատանքային խմբի նոր անդամ: Նա կիսվեց իրենց երկրում բարձրագույն վերահսկման մարմնի աշխատանքի առանձնահատկություններով` տեղեկացնելով, որ հաջորդ տարի նշյալ հանձնաժողովի նիստը հյուրընկալելու է իրենց երկիրը:

Բրազիլացի պատվիրակը բարձրաձայնեց Հայոց ցեղասպանության մասին` նշելով, որ կիսում են հայերի ցավը:

Ազգային առանցքային ցուցանիշների հանձնաժողովին անդամակցում է 22 պետություն` Հայաստան, ՌԴ, ԱՄՆ, Ավստրիա, Բուլղարիա, Չինաստան, Ֆինլանդիա, Հունգարիա, Իտալիա, Ղազախստան, Լիտվա, Պակիստան, Լեհաստան, Սլովակիա, Շվեյցարիա, Ուկրաինա, Մոլդովա, Բրազիլիա, Զամբիա, ՀԱՀ, Ինդոնեզիա, Մարոկկո, իսկ Բելառուսն ու Ղաղզստանը` որպես դիտորդ:

Բարձրագույն վերահսկիչ մարմինների միջազգային կազմակերպության Ազգային առանցքային ցուցանիշների հանձնաժողովը հիմնադրվել է 2007 թվականին: Հանձնաժողովի աշխատանքները միտված են ազգային ռեսուրսների արդյունավետ կառավարման հակամարգերի բարելավմանը: