Աշխարհի առաջին ռակետ Նովակ Ջոկովիչն «Ուիմբլդոնի» երրորդ շրջանում ամերիկացի Սեմ Կուերիից կրած անակնկալ պարտությունից հետո որոշել է հանգստանալ։ Սերբ թենիսիստը որոշել է չմասնակցել Դևիսի գավաթի առաջիկա խաղերին։
-Դևիսի գավաթի՝ բրիտանացիների դեմ հանդիպումներին չեմ մասնակցի։ Տորոնտոյի մրցաշարի վերաբերյալ էլ վերջնական որոշում չեմ կայացրել։ Թենիսից բացի ես ունեմ ընտանիք։ Հիմա ցանկանում եմ ավելի շատ հարազատներիս հետ ժամանակ անցկացնել։ Դա ինձ պետք է։ Մրցաշրջանն ինձ համար հաջող է դասավորվում, բայց այն շատ երկար և հոգնեցնող է դառնում։ Պարզապես ինձ հանգիստ է անհրաժեշտ,-ասել է Ջոկովիչը։
Հավելենք, որ Դևիսի գավաթի խաղարկության՝ Սերբիա-Մեծ Բրիտանիա 1/4 եզրափակչի հանդիպումները կայանալու են հուլիսի 15-17-ը, Բելգրադում, իսկ Տորոնտոյի մրցաշարը մեկնարկելու է հուլիսի 25-ին։
