Ընտրախախտումների վերաբերյալ 83 դեպք ոստիկանությունում գտնվում է քննարկման փուլում

ՀՀ նախագահական ընտրությունների հետընտրական փուլում տեղի ունեցած ընտրախախտումների վերաբերյալ ստացված տեղեկություններով’ քննարկվել և քննարկման փուլում է գտնվում 83 դեպք:

Ոստիկանությունից տեղեկացնում են, որ դրանցից 17-ը վերաբերում է ընտրակաշառքներին, 25-ը’ մեկից ավելի անգամ կամ այլ անձի փոխարեն ընտրելուն, 13-ը’ քաղաքացու ընտրական իրավունքի ազատ իրականացմանը խոչընդոտելուն, 5-ը’ ընտրատեղամասում կատարված վիճաբանությանը և սպառնալիքին, 4-ը’ քվեարկության գաղտնիությունը խախտելուն, 6-ը’ ընտրությունները կամ քվեարկության արդյունքները կեղծելուն, 2-ը’ ընտրական հանձնաժողովի աշխատանքներին ու դիտորդի լիազորությունների իրականացմանը խոչընդոտելուն և 11 այլ խախտումներ’ կապված ընտրացուցակների անճշտությունների և ընտրական հանձնաժողովների աշխատանքի հետ: Նշված 83 ահազանգերից 43-ը ստացվել է Երևան քաղաքում, իսկ 40-ը’ մարզերում:

Հիշյալ 83 դեպքերից 43-ի վերաբերյալ ահազանգեր են ստացվել քաղաքացիներից /լրատվամիջոցներով և հեռախոսակապով/, 35-ը ստացվել են Ր. Հովհաննիսյանի նախընտրական շտաբներից և վստահված անձանցից, 5-ը’ ՄԻՊ գրասենյակից:

Ստացված ահազանգերով և դեպքերով համապատասխան ստորաբաժանումների կողմից կատարվում են ստուգումներ և նախապատրաստվում են նյութեր:

Նշված 83 դեպքերից 55 նյութով որոշում է կայացվել քրեական գործի հարուցումը մերժելու մասին, 16 նյութեր եզրակացությամբ շարք են կցվել’ թողնվելով անհետևանք, 5 նյութ ուղարկվել է ՀՔԾ, որից 1 նյութ հետ է վերադարձվել և լրացուցիչ նախապատրաստումից հետո մերժվել, 2 նյութ միացվել են հարուցված քրեական գործերին, 5 նյութ, որպես նույնաբովանդակ, կցվել է ընթացիկ նյութերին, որոնցով քրեական գործի հարուցումը մերժվել է, 1 նյութով հարուցվել է քրեական գործ և կատարվում է նախաքննություն:

Հետևեք մեզ նաև Telegram-ում