«Ընտրություններից հետո խոսել զինվորներին հրահանգելու մասին առավել քան ծիծաղելի է»: Այս մասին Times.am-ին ասաց ՀՀ ՊՆ մամլո խոսնակ Արծրում Հովհաննիսյանը՝ մեկնաբանելով այսօր «Հայկական ժամանակ» թերթում հրապարակված այն տեղեկությունը, թե Երևանի գրանցում ունեցող զինվորներին ավագանու ընտրությունների ժամանակ արձակուրդ է տրվելու:
«Փորձը ցույց է տվել, որ ոչ միայն զնվորներին չեն հրահանգում, թե ում ընտրել և նրանք ազատ ընտրում են ում ուզում են, այլև գործնականում դա հնարավոր չէ ստուգել: Խոսել, թե ում են ընտրել, ավելի քան ծիծաղելի է»,- նկատեց Ա.Հովհաննիսյանը:
Նշենք, որ նախագահական ընտրությունների ժամանակ հաճախ էին հաղորդում այն մասին, թե զինվորների ընտրության վրա ազդում են՝ ստիպելով ընտրել նախագահ Սերժ Սարգսյանին, սակայն հակառակ փաստեր նույնպես արձանագրվել են, երբ օրինակ՝ Արմավիրում զինվորներն իրենց քվեն տվել էին Րաֆֆի Հովհաննիսյանի օգտին:
Ա.Հովհաննիսյանը նաև ընդգծել է, որ բազմիցս նշվել է, որ պետք չէ ավելորդ անգամ շահարկել բանակի անունը:
