Մարտի 21-ը կարող է բեկումնային լինել թուրք-քրդական հարաբերություններում

Մարտի 21-ը կարող է շրջադարձային լինել թուրք-քրդական հարաբերություններում:Այսօր Դիարբեքիրում տեղի ունենալիք Նովրուզի տոնակատարության ժամանակ հրապարակվելու է ի քրդական խնդրի լուծման վերաբերյալ թուրքաբնակ քրդերի առաջնորդ Աբդուլլահ Օջալանի’ քուրդ ժողովրդին ուղղված ուղերձը: Քուրդիստանի աշխատավորական կուսակցության (PKK) նախագահ Օջալանը ցմահ դատապարտվել եւ Իմրալի բանտում է: Օջալանի ուղերձը կհրապարակեն Թուրքիայի խորհրդարանում միակ քրդական’ Խաղաղություն եւ ժողովրդավարություն կուսակցության (BDP) պատգամավորներ Փերվին Բուլդանը եւ Սըռը Սուրեյա Օնդերը:Այս առիթով Դիարբեքիր են ժամանել թուրքական եւ արտասահմանյան 500-ից ավելի լրագրողներ:

BDP-ի առաջնորդների հաղորդմամբ’ Օջալանը PKK-ին եւ քուրդ ժողովրդին ուղղված ուղերձում, որը, ենթադրվում է, շուրջ 5 ամիս ընթացող բանակցությունների արդյունքում համաձայնեցված է թուրքական կառավարության հետ, կոչ կանի Թուրքիայում քրդական մշակութային ինքնավարություն ստեղծելու դիմաց դադարեցնել 1987 թ-ից տարվող զինված պարտիզանական պայքարը, որը մինչ այժմ 40 հազարից ավելի մարդու կյանք է խլել: